Tin alternativa: manda dos minister cas

ORANJESTAD – “Aruba ta lantando poco poco den e REALIDAD NOBO den cual Mike Eman a hinca nos aden. Un Aruba cu a perde su autonomia financiero, y un Aruba cu ta wordo suta cu medidanan cruel.
E medida di AVP pa hisa e BBO ta uno ad-hoc, y masha mal pensa. Ta obvio cu ta algo riba man nan a core hasi pa scapa cara di Mike Eman di un otro maatregel di Hulanda.
Sinembargo e realidad a dal duro, y hopi ta esnan cu ta birando lomba pa AVP. Den ultimo dianan ta hopi ta esnan cu a aserca nos y puntra nos con porta cu ta AVP mes a hisa e BBO, anto mas cu 3%. Hendenan ta hopi preocupa”, asina lider di MEP Evelyn Wever-Croes a duna di conose.

COMPENSACION MINIMO
Lider di MEP a reacciona riba e compensacion minimo cu AVP kier brinda awor cu ta hisa e BBO riba e nivel original di 3%. Tempo cu MEP a introdusi BBO na 2007 a introdusi tambe varios compensacion den loonbelasting, inkomstenbelasting, winstbelasting y invoerrechten. Awor e fraccion di AVP a duna compensacion pa empleadonan so y a lubida pensionadonan y esnan cu ta gana minimumloon. E compensacion pa colmo ta pa cambia un medida cu nan mes a bin cune na 2013 ora a aumenta e premie di AZV. Ta duna trahadornan compensacion di 25 florin cu un man, y ta ranca 100 florin cu otro man ora cobra e aumento di BBO. E compensacion no ta suficiente, e ta hopi mal studia. Pa colmo e parlamentarionan di AVP no sa mes kiko nan mes a pone riba papel pasobra nan a anuncia cu tin compensacion pa pensionadonan siendo cu esey ta un mentira!

MEP KIER ALTERNATIVA, NO MEDIDA
Lider di MEP a duna di conose cu MEP ta contra e medida aki, pasobra tin alternativa. E medida aki ta trese un alivio den gasto di gobierno cu 16 miyon florin. Pero si a scohe pa e alternativa, y manda dos minister cas lo a scapa 17 miyon florin y lo a causa hopi menos dolor na henter nos pueblo. Ta djis dos hende mester busca un otro trabou. "Pero e decision di AVP pa suta henter un pueblo cu aumento di BBO, ta un medida cruel y hopi egoista" segun Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co