BBO TA BIRA 3,5% OTRO SIMAN

ORANJESTAD -- 11 parlamentario di AVP a aumenta e tarifa si Bazv cu 1% entrante otro siman. Cu esaki, e BBO cu originalmente tabata 3%, entrante otro siman ta bira 3,5%.
Fraccion di MEP a vota contra e aumento aki, na prome lugar pasobra e ta un medida cruel pa pueblo siendo cu tin otro alternativa. Lider di MEP Evelyn Wever-Croes a splica cu MEP ta opta pa e alternativa di elimina dos puesto di minister. Esey lo baha gasto di gobierno cu 17 miyon florin, mientras cu e medida di aumento di BBO ta genera 15 miyon florin extra pa caha di gobierno.
MEP ta contra e medida aki tambe pasobra e partido na mando no a gana eleccion primintiendo esaki! AVP desde 2007 structuralmente a bisa cu lo elimina e BBO. Tur e integrantenan di MEP a mustra riba expresionnan hasi pa lider di AVP Mike Eman y su coleganan cu lo elimina BBO, pero awe nos por constata cu esey tabata oportunismo politico di AVP: priminti un cos den campanja, y hasi otro cos den gobernacion

MIKE EMAN AUSENTE
Mike Eman mes no tabata tin e curashi pa atende e reunion y a core biaha pa evita di tey presente. Un acto cu oposicion a cataloga como un acto di cobardia. Henter e debate a draai rond di Mike Eman y su promesanan falso, mas e weganan facista cu Eman ta hunga den politica.

"Awe tabata un reunion historico, pasobra masha poco pais na mundo bo ta mira un prome minister cu a priminti di elimina un belasting, ta bras'e y hasta ta aument'e! No ta cos cu bo ta wak tur dia. Fraccion di AVP tabata hopi debil y cu temor. Constantemente a trata na desvia di e tema di aumento di BBO. Masha poco di nan kier a hiba palabra, pero na final si nan a bai celebra na Sidebar Cafe riba lomba di pueblo.
Mi tin un duele den mi curason cu e medida cruel aki, pasobra mi sa cuanto hende awor caba ta pasa necesidad. Pero mi conseinshi ta limpi, nos a hasi lo maximo pa sali na vanguardia di pueblo" Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co