Un don cu ta resalta den Gabinete Eman constantemente ta esun di gaña wowo di nos cuidadanonan. Netamente esaki te caso cu e propaganda pa e reparatietoeslag cu parlamentarionan di AVP tanto ta gaba cune. Ta como sifuera dia a haya reparatietoeslag diripiente a drecha e calidad di bida di nos cuidadanonan. Den e comunicado di awe nos ta bai splica na un manera simpel cu e reparatietoeslag miserabel cu Gabinete Eman a duna ta insignificante. Na promer lugar e reparatietoeslag aki supuestamente lo mester tawata pa recupera poder di compra. Dependiendo dibo salario bo lo haya un "vergoeding netto" riba bo salario. E grupo di cuidadanonan cu a bin remarca pa esaki ta esnan cu un salario minimo di 1636 florin pa luna cual a cuminsa haya un compensacion di 75 florin te cu e cuidadano cu un salario di maximo 2500 florin cu ta haya compensacion di 25 florin.

Pero pueblo mester realisa cu loke Gabinete Eman dunabo e ta kite bek for dibo brutalmente. Ban tuma como ehempel un cuidadano cu ta gana minimumloon (1636). Den principio e la haya 75 florin right? Durante e periodo di 2011-2015 tawatin varios tipo di ahustacion cual nos lo recapitula. Na mas cu un ocasion (4x) a aumenta primanan di AOV y AZV cu 1%. Si bo hasi un calculacion simpel 1% di 1636 ta 16 florin cu 36 cent y considera cu na 3 ocasion primanan di AOV y AZV a bai laira ta nifica cu a kita por lo menos 16.36 x 3 = 48.08 florin for dibo na primanan. Un otro ahustacion cu a bin cune ta e pensioenobligatorio cu a cuminsa cu 1% bai te 3% na 2015. dus si akinan bo tuma 2% mes ta 32.72. Awor promer cu cualkier parlamentario core bin dilanti y bisa esaki ta bon pa e cuidadano e no mester lubida cu e la condena e cuidadano pa traha te 65 pero e no a bisa nada di aumento di suma di pensioen si. Otro gasto cu a bin serca pabo como cuidadano ta e cobransa pa recohe sushi cu pa luna ta 26.50.

Pa recapitula e 75 florin cu abo cuidadano cu ta cobra minimumloon a haya a bai na lo siguiente:


Si bo a tuma nota den e ehempel aki ya caba bo 75 florin cu ta suppose di ta un reparatietoeslag a bai te chup! Pasobra bo a haya 75 florin y na e otro banda bo a saca 107.30 ya caba bo ta den 32 florin den MIN. Akinan bo no por papia mas di aumenta poder di compra pasobra e efecto ta uno negativo pa e cuidadano con bo bire!

Pero e ahustacionan ariba menciona ta solamente e comienso pasobra durante e periodo 2010-2015 a subi tambe entre otro : 1) grondbelasting cu 15% , 2) aumento di inkomstenbelasting/loonbelasting door di eliminacion di implementacion di e inflatiecorrectie 3) cobra parkeermeter. E ahustacionan aki ta poco fastioso pa interpreta den placa pasobra tur caso ta diferente pero e linja cora ta cu bo a keda bai atras. Pero si por ehempel bo tawata paga mes un suma di 200 florin na grondbelasting y esaki a subi cu 15% ta nifica cu bo a paga 30 florin mas pero logicamente esaki ta varia. Pa loke ta trata e inflatiecorrectie un persona cu ta gana minimumloon no ta paga belasting pero ban bisa e ta net pasa e grens di belastingvrij e medida aki sigur a pone bai atras den su florinan cu e ta gana. E di 3 medida ta conta pa esnan cu ta confronta nan mes cu tur luna tin 60 florin menos pasobra tin cu paga pa nan por bai traha. Sigur esnan cu ta victima di e medida aki por bisa bon cla cu e miserabel reparatietoeslag di nada no a yuda!

Pero Gabinete Eman no a keda te eynan pasobra e sistematica di BBO cu tanto a critica nan a aumenta esaki na dos ocasion cu 1% (dus 2%). Pa colmo a introduci e asina jama "exchange margin tax rate" cu tambe ta hasi abo como cuidadano mas debil ora di swipe bo atm cu otro machine ora di compras. Pero considerando cu e priopio Prome Minister Eman mes ta papia cu e structura di BBO/BAZV tin 3 schakel esaki ta un aumento considerabel di 6%! Bo ta imaginabo con hopi bo a bai tras? Realidad cruel ta cu esaki ta wordo kita for dibo entrada netto perhudicando bo poder di compra na un forma hopi drastico! Si bo hasi bo mes e pregunta kiko Gabinete Eman a hasi pa di berdad stimula poder di compra bo lo haya como contesta NADA! Pasobra pueblo por a constata pa su mes cu prijsnan a bai drasticamente halto! Di tanto critica nunca Prome Minister Eman no a pone un control ora tawata cobra BAZV/BBO na un forma inhusto rancando placa di pueblo inhustamente!

Kiko bo por conclui di tur esaki? Loke Gabinete Eman dunabo e ta kite bek for dibo 3x pa 4x biaha mas sin piedad. Tanto bal bo a haya un reparatietoeslag y e ta kite bek for dibo cu medidanan! Pero logicamente ningun representante di AVP no ta bai papia riba e cosnan aki pasobra nan ta den e mundo di manipula y purba na crea e scenario cu tur cos ta bon y tur hende tine bon ignorando nan falta di compromiso cu pueblo. Ta di lamenta cu constantemente Gabinete Eman gaña wowo di nos cuidadanonan mientras realmente e ta castigando cada un di nos cu medidanan ignorando su compromiso cual mester tawata eleva calidad di bida.

Expresionnan haci den e articulo aki no necesariamente ta refleha opinion di ArenaPoliti.co