Den e presentacion di Sra. Ronnie Goldberg durante di e ‘’Annual Corporate Event” di ATIA diabierna pasa, a accentua un biaha mas e importancia di renobacion di nos mercado laboral cu e meta pa crea mas oportunidad pa trahadornan, mas competencia husto pa empresanan y renobacion di formanan di traha pa nos ta mas productivo como pais. Esaki ta exactamente e metanan cu partido AVP a y tin como meta den e maneho laboral. E renobacion di leynan laboral tres aña pasa tur tabata tin e meta pa elimina competencia inhusto pa trahadornan, kita obstaculonan pa hende muhe den mercado laboral, para tur forma di "cheap labor" y habri mas oportunidad pa trahadornan den nan empresa. Pa elimina competencia inhusto pa companianan y pa trahadornan local, ainda tin trabao pa haci. Pero e ley cu a aproba pa pone di responsabilidad serca e empresa principal pa pago di prima y belasting y e renobacion di e sistema di belasting, ta pasonan importante den crea mas "trato igual" pa companianan y pa trahadornan local. Pesey tabata un placer pa tende sra Goldberg accentua e importancia di e metanan aki for di su punto di bista internacional. E meta pa logra un desaroyo economico continuo y un mercado laboral balansa ta keda e meta principal pa nos na Aruba tambe: husto pa trahado y rendabel pa empresanan.

ENSEÑANSA
Remarcabel tabata e importancia cu sra. Goldberg a duna enseñansa den maneho di mercado laboral. Ela mustra cu tur caminda rond di mundo, e inversionnan den capacitacion continuo di trahadornan pa nan por haci nan trabou miho, cu miho servicio y den forma mas efectivo, a yuda tanto e trahado, su compania y al fin e pais. Esaki ta conta pa sector publico y pa sector priva. Ta lamentabel pa constata cu tanto den sector priva como den sector publico mucho poco ta wordo inverti den educacion, profesionalisacion, up-grading di trahadornan. Consecuentemente e posibilidadnan pa renoba formanan di traha ta stagna. E posibilidadnan pa e trahado crece den su compania y asumi responsabilidadnan nobo, tambe ta keda limita. Pesey bo ta wak cuanto trahado ta haci e mes un trabou pa masha hopi aña. E motibo no ta semper cu e trahado no kier haci otro trabou. Hopi biaha ta cu e no ta haya oportunidad pa crece y cada biaha ta wak otro hende drenta e compania y asumi un funcion mas halto cu un miho salario. Cu un tiki esfuerso, e trahado leal lo por a siña mas, adkiri conocemento y habilidadnan nobo y asina haci mas pa e compania y pa su mes. Pa un compania mes e posibilidad cu un trahado cu ya nan conoce como bon trahado, por crece y tuma funcionnan nobo, ta mas atractivo cu trece un hende di afo. Tur hende tin bentaha den inverti den enseñansa di nos trahadornan "on the job". E tema di promove profesionalisacion den empresanan mes, lo mester ta un tema cu companianan, sindicatonan y gobierno lo mester trata den Dialogo Social y yega na fondonan y formanan pa promove esaki hopi mas den mercado laboral di Aruba.

Expresionnan haci den e articulo aki no necesariamente ta refleha opinion di ArenaPoliti.co