ORANJESTAD – E siman aki Prome Minister Mike Eman a comparti e esfera di orguyo y alegria cu a biba durante e anochi di graduacion di Colegio Arubano VWO. Dilanti di un ballroom yen di studiante, mayornan y docentenan, Premier Eman a expresa den algun palabra su admiracion y speransa den e hobennan, pero tambe tur otro cu ta forma parti di nan exito academico.

E mandatario a cuminsa na indica cu e anochi di graduacion di scol secundario ta uno special, uno cu por ta e hoben no ta realisa aworaki, pero cu no ta bay lubida nunca mas. E ta keda diferente te hasta di ora cu den futuro, nan alcansa nan diploma como dokter, abogado of ingeniero.

“E momento aki pa prome biaha den bida bo a pone un meta bo dilanti y bo a alcance y e sentimento di logra algo asina grandi, pero na mesun momento di tuma decision di unda y kico pa bay studio ta un momento di transicion hopi special,” tabata e palabranan di Minister President Eman.

Den combersacion cu Isabella Christina Croes, kende ta e miho graduado di aña escolar 2014/2015, Prome Minister a tuma nota cu hobennan tin un vision amplio di bida. E mandatario ta referi na e hecho cu nan ta consciente di e importancia cu estudio ta hunga den nan futuro, pero tambe ta reconoce cu nan tin un deber social.

Cada dia mas, hobennan ta envolvi den actividadnan comunitario y ta busca maneranan pa aporta na causanan social. Libremente nan por dialoga cu hobennan di otro paisnan, danki na tecnologia, riba temanan cu ta impacta nos globalmente.

“Esaki ta loke nos kier den nos hobennan banda di e ambicion pa traha un carera y crea un futuro cu hopi prosperidad,” Prome Minister Eman a bisa, añadiendo cu “Nos kier mira den nos hobennan tambe e sentido compasion pa e prohimo y un curason grandi.”

E influencia di mayornan y otro figuranan di guia ta hunga un papel importante den tur esaki. “Mayornan a duna confianza y sosten y pasenshi, mientras cu hobennan a absorba tur loke nan mayornan por a siña nan pa logra loke nan a logra.” Minister President a gradici tambe e docentenan cu ta para dilanti di klas cu hopi pasenshi.  

El a clausura su mensahe pidiendo e publico pa uni den un peticion y deseo:“Ban celebra awe nochi y pidi Creador pa sigui inspira nos hobennan pa nan por sigui progresa y haci e escogencianan cu lo haci nos tur como mayor, docente y pais Aruba, sumamente orguyoso.” 

Expresionnan haci den e articulo aki no necesariamente ta refleha opinion di ArenaPoliti.co