MEP no ta presenta niun argumento y ta baha na nivel di lansa acusacion y ofende hende. 

Awemainta Parlamento a trata e cambio di ley pa baha e prima cu trahadornan tin cu paga pa cuido medico (AZV). Na mes un momento e ley ta aumenta e porcentahe di BAZV cu 1%, cu ta pa crea entrada pa cubri gastonan di cuido di salud di tur hende na Aruba. E resultado final ta cu trahadornan ta keda cu mas placa den nan cartera, pasobra nan ta bay paga mitar di loke nan tabata paga for di nan salario na seguro medico. Na mes un momento enbez di laga 70 pa 80 mil hende carga tur e costonan di seguro medico, e ley aki ta bay percura pa 1.2 MIYON hende carga e costonan di cuido medico di AZV. Hopi mas hende hunto ta bay paga menos pa cuido di salud. Tur e placa di BAZV ta bay pa seguro medico.

OPOSICION
Enbez di presenta proposicionnan pa mehora e ley mas of di presenta argumentonan pa mustra algo cu no ta bon den e ley, e cinco miembronan di MEP cu tabata presente diabierna mainta, no a haci nada otro cu lansa acusacionan personal sin base y ofende hende. Pa un ley asina importante, apenas 5 miembro di e fraccion di MEP tabata presente den ora di mainta. Na fin di e reunion  apenas cuatro di nan tabata presente. Kier men cu MEP no a trata contenido di e ley y no a ni presenta cu tur su miembronan pa e reunion. E critica cu miembronan di MEP no ta bay traha, a keda demostra awe atrobe. E echo cu MEP no ta trata e contenido di leynan, pero ta keda limita na haci desorden den sala di Parlamento, ta preuba e estado di decadencia di e partido y e incapacidad pa sikiera presenta propio ideanan.
Rene Herde':"Ta tristo di berdad cu esaki ta con oposicion ta funciona. Democrasia ta beneficia di bon gobernacion y bon oposicion. Lamentabelmente Aruba no tin un oposicion cu por funciona na nivel cu nos pais merece. Ta pesey nan ta organisa gruponan manera e grupo di 7 ciudadano, e grupo contra mulinanan di biento y awor e grupo cu ta bisa di kier PARA desmantelacion di e refineria. MEP ta lanta tur sorto di grupo satelite, pa haci trabou cu e fraccion mes no por. Pa loke ta trata e ley mes, fraccion di AVP cu a cambia presupuesto pa haci e ley aki posibel, si ta vota na fabor didje. Pasobra trahadornan y pensionadonan ta keda cu mas placa den nan cartera, nos tur ta tene nos cuido medico y ta haci e fondo di AZV menos dependiente di gobierno. Tur bon motibo pa sostene e ley aki."

Expresionnan haci den e articulo aki no necesariamente ta refleha opinion di ArenaPoliti.co