Apreciabel lectornan di Aruba, den e ultimo dianan mi a describi extensamente con e gobierno aki tin planea pa derocha 750miyon (750.000.000,00) florin riba un aventura berde, esta un caminda di 4 via for di aeropuerto pa Savaneta.
Cu razon tur caminda riba Aruba ta ser protesta energicamente contra e plan idiota y cuestionabel aki, un plan di LOCONAN!
Parlamento di Aruba, movecionnan bao di Pueblo, Nos ta Aruba, PARA, asociacionnan, organisacionnan comercial, tur a expresa nan mes hopi cla CONTRA desmantelacion di e refineria, y sigur no durante e aña aki, pa asina ey duna expertonan manera sr. Nelson English TUR chens pa realisa un re-apertura di esaki.
P’esey tambe mi ta propone Pueblo di Aruba lo siguiente: insisti cerca gobierno pa NO derocha 750miyon florin na un “Green Corridor”, pero usa e placa ey pa cumpra e refineria.
Pasobra e ora ey e refineria ta bira propiedad di Aruba, di e Pueblo di Aruba, di NOS !, y asina ey nos lo por huur e refineria na un explotador/operador, sea via een joint-venture of no, y di e manera aki Aruba hasta ta recobra su inversion for di e entrada for di e huur y for di e ganashinan di e refineria.
Kiko bo ta prefera? Malgasta y derocha 750miyon den un “Green Corridor” mediante algun companianan anonimo chicito cu ta propiedad di famia di ministernan di AVP manera Benny Langevinger y Mieke Eman, OF bira doño di un refineria cu ta paga Aruba huur, cu ta produci ganashi, cu ta duna trabao na hopi Arubiano, y cu ta percura cu hopi expertonan Arubiano, kendenan awor obligatoriamente ta trahando na Medio Oriente of Surnam, ta regresa nan isla natal back??
Esaki ta un sugerencia for di e “think-tank” di Nos ta Aruba; abo tambe por laga bo opinion y voz resona!!
Sigui nos riba Facebook – NostaAruba.

Den nomber di “Nos ta Aruba”
Jan de Ruijter – This email address is being protected from spambots. You need JavaScript enabled to view it.
Oranjestad, juli 3, 2015

Expresionnan haci den e articulo aki no necesariamente ta refleha opinion di ArenaPoliti.co