Siman pasa e Fraccion di AVP den Parlamento a pasa 3 medida riba e lomba di Pueblo. Ta trata aki di e Green Corridor cu su gastonan exorbitante pa e proximo 25 aña, e cobransa pa parkeer den centro di Oranjestad y e subida di BBO te na 3.5%. Cu esaki partido AVP a comproba con nan a manipula Pueblo pa nan por a yega y keda na poder.

Elimina BBO
Ta ken no ta corda e promesa di Minister Mike Eman di elimina BBO? Hasta video a wordo traha pa asina propaganda y programa e promesa aki den mente di e Pueblo. Ta ken no ta corda e tantisimo articulo di prensa di Minister Eman riba con malo BBO ta pa Aruba? Partido AVP a demonisa BBO y a hinca den cabes di mayoria di e Pais aki cu ta BBO ta nos porblema nr 1 y dia cu e keda elimina tur cos lo ta bon. Ata nos awe dilanti e realidad, Mike Eman NO a elimina BBO, ela keda cune y a subi BBO na 3,5%. Cu esaki a keda demostra cu Mike Eman y AVP a manipula e Pueblo aki ganiando nan sin ningun tiki berguensa. Y mas tristo, Minister Eman no tabata tin ni e decencia di bin atende cu e reunion publico pa hisa BBO. Ela gania biaha ya cu e mandatario no tin curashi pa enfrenta e berdad di tur su manipulacion.

Friends and family
Otro manipulacion cu AVP a usa pa yega na poder ta di a tilda partido MEP di ta goberna pa friends and family. Pero tuma por ehempel e proyecto di Green Corridor. Tur hende por a ripara caba cu tras di e proyecto aki lo mester tin sostenedor, sponser of brochi di Minister Sevinger. Pasobra pakiko diripiente Minister Sevinger ta bisa cu e proyecto lo por bay sali mas caro cu premira? Ta bisto caba cu brochinan lo mester bay wordo beneficia den e proyecto aki di un of otro manera. Pa locual ta e proyecto di cobransa pa parkeer den centro di Oranjestad ta mesun tiro. Hende hopi liga na Minister Sevinger lo a busca container cu parkeermeters for di basta tempo caba y lo ta wardando e anuncio pa nan por start sali ehecuta e proyecto. A menos cu Minister Otmar a percura pa cambio den esaki y lo a otorga e compra di parkeermeters na un otro brochi di partido. Di tur manera, den e dos proyectonan aki so caba ta bira bisto cu partido AVP cu tanto a manipula Pueblo contra MEP, awor ta goberna na beneficio di brochi.

Manipulacion pa yega y keda na poder
Ta tristo pa remarca, pero e ta e berdad. Partido AVP a manipula Pueblo pa gana eleccion y yega na poder. E propaganda di elimina BBO y friends and family tabata djies un farsa pa demonisa MEP y saca probecho politico y awe esey ta bolbe keda comproba. Mas tristo ta cu AVP pa falta di capacidad pa goberna lo keda manipula e Pueblo aki pa nan por keda na poder.

7 juli 2015

Expresionnan haci den e articulo aki no necesariamente ta refleha opinion di ArenaPoliti.co