ORANJESTAD – 23 di September awo ta tuma luga e prome edicion di TEDx-Aruba na unda antes tabata John F. Kennedyschool. E tema di e prome TEDx na Aruba ta bay ta rond di e tema, “Island of Sustainable Solutions”. E ta un iniciativa di Prome Minister Mike Eman, cu a anuncia e evento siman pasa.

Pa e anuncio Eman tabata den compañía di Jim Stoltze, personahe di Television, escritor y promotor ferviente di TEDx. Stoltze a wordo apunta pa TED.com como un di e 12 e “TEDx Ambassadors” mundial. E “TED-Congres” ta un reunion anual cu ta tuma luga na California (Merca) caminda grandinan di mundo ta haya e oportunidad di comparti nan ideanan y vision cu henter mundo. Na 2009, Sr. Stoltze a logra un edicion di TED pa Hulanda y hunto cu su team a organisa pa cuatro biaha consecutivo, entre otro, ‘TEDx Amsterdam’. E evento a logra haya atencion di medionan Europeo y TEDx-Amsterdam a logra gana un “European Design Award” y a wordo nomina pa prestigioso revista ‘High Profile’ como evento di aña.

E abreviacion TED ta referi na “Technology, Entertainment and Design”, pero den caso di Aruba, a batisa esaki como “Technology, Education and Design”. Ken ta e oradornan pa e prome edicion di TEDx na Aruba no ta conoci ainda. Pero un cos ta sigur, e mihor orador di e TEDx edicion hubenil cu ta bay tuma luga dentro di poco, ta wordo invita pa esaki. Tur orador ta tene un presentacion cortico tocante un di e temanan; tecnologia, educacion, diseño of solucionnan duradero.

Segun Stoltze, ideanan por realisa cambionan concreto. “Nos ta propaga bon ideanan te na e extremo cu TEDx. Iniciativanan local pa eventonan-TED ta wordo encurasha y por haya licencia pa esaki. E ta mi trabou pa biaha rond di mundo y yuda organisa e tipo di eventonan aki.”

Eman tabata un orador tambe na e TEDx Binnehof. E principio di presentacionnan cortico y conciso tocante di topiconan relevante a atra’e. “Nos gobierno kier desaroya Aruba den un comunidad caminda felicidad y bienestar general ta central.  Eseynan ta bunita palabra, pero e ta un reto pa dun’e contenido.” Gobierno tin como meta pa Aruba su nececidad energetico ta procedente di energia sostenibel pa 2020. “Un evento manera TEDx-Aruba ta atrae hendenan cu por duna curpa y alma pa logra sostenibilidad. Nos ta yama Bon Bini na algun persona briyante fin di September riba nos isla bunita”. E Prome Minister a enfatisa cu mundialmente ta sigui desaroyonan di Aruba su buskeda na solucionnan sostenibel. Si Aruba por yega un paso mas dilanti via di un evento manera TEDx, nos no ta yuda unicamente nos mes, pero nos lo ta e ehempel pa resto di mundo.”

TEDx-Aruba por conta cu sosten di Ministerio di Asuntonan Exterior di Reino tambe. E ta e intencion ta cu tur embahada Hulandes ta promove y sigui e evento aki via livestream.

Expresionnan haci den e articulo aki no necesariamente ta refleha opinion di ArenaPoliti.co