Aña 2015 ta priminti di bira uno yen di desaroyo, principalmente riba tereno di sostenibilidad. Pueblo y mundo lo mira con Aruba ta avansando riba e tereno aki. Esaki tabata un di e temanan cu Prome Minister Mike Eman a papia riba dje cu prensa di Aruba den e prome conferencia di prensa di Gabinete Mike Eman II di aña 2015.

Ademas di e proyecto di Solar Park na aeropuerto, cu ta un di esnan mas grandi cu tin den region, tin otro plannan pa ehecuta. Minister di Infrastructura hunto cu EcoTech ta trahando duro pa por yega na un acuerdo cu sushi di cas tambe ta bay wordo procesa via di e sistema di ‘Waste to Energy’ (W2E) cu EcoTech a introduci pa sushi industrial aña pasa. Un palabracion lo bay crea, segun Prome MInister Eman a bisa prensa, un situacion totalmente diferente di loke cu tin aworaki na dump.

E situacion di dump ta sigui un preocupacion pa Gabinete Mike Eman II, ya cu e ta completamente yen "y ta pone hopi presion riba nos medio ambiente". Si por maneha e sushi di cas via di e sistema di "waste to energy" no solamente e ta contribui na aumenta e cantidad di energia sostenibel cu ta ofrece na comunidad, pero lo resolve tambe un problema grandi di sushi.

E plannan di Gabinete Mike Eman II ta bay hopi mas leu, e mandatario a bisa, ya cu esaki ta e aña cu kier logra instala panelnan solar riba mayoria di scol na Aruba. E ta un plan ambicioso, pero cu lo tin su beneficionan hopi lihe. "Nos kier pa e proyecto aki bira un exito pa logra dos aspecto. Nos por logra e expansion di e capacidad di energia alternativa cu 7 pa 8% hunto cu e cantidad cu a logra caba na e parke solar di aeropuerto. Na mesun momento e ta permiti nos introduci airco na scolnan, principalmente debi cu awo ta bay bin cu Trai’merdia pa Scolnan Secundario. E proyecto ta un bunita combinacion pa logra esaki."

Gabinete Mike Eman I y II a pone como meta pa avansa riba tereno di creacion di energia alternativo. Asina a cambia entre otro e forma cu WEB ta produci awa y coriente den forma mas eficiente y den un tempo cortico tambe ta bini cu un tipo almacenahe di coriente extra den un sistema den profundo di lama. Pero tambe ta sigui cu e plan pa bini cu un di dos Parke di Molina na Urirama.

Creacion di energia di un forma sostenibel ta un di e tres puntonan cu Ministerio di Asuntonan General, Innovacion, Desaroyo Sostenibel y Ciencia ta bay concentra riba dje den aña 2015, den coordinacion cu otro Ministerionan.

Expresionnan haci den e articulo aki no necesariamente ta refleha opinion di ArenaPoliti.co