Aña 2015 ta bira e aña cu Gabinete Mike Eman II ta realisa e soño di hopi decada pa separa e waf di carga y crucero di otro. Trabounan di construccion pa waf di carga nobo na Barcadera a cuminsa den 2014 y pa fin di aña aki ta keda finalisa.

Prome Minister Mike Eman a bisa miembronan di prensa den su prome conferencia di 2015 cu e proyecto aki ta uno cu su Gabinete ta orguyoso di por realisa despues cu pa hopi decada e asunto aki tabata den discusion. No solamente pa loke e lo nifica pa e movecion di carga, pero e lo nifica hunto cu e demas proyectonan, hopi trabou den mundo di construccion tambe.

"E containerhaven ta un estimulo pa nos mira si Aruba por bay hunga un rol un poco mas intensivo como un ‘transshipment harbour’, apesar cu estudionan den pasado a mustra cu hopi di e espacionan ey ta wordo ocupa caba door di paisnan manera Panama," Prome Minister Eman a indica. Sinembargo e mandatario a expresa cu e no ta perde speransa pa logra e meta aki, si a yega di constata un aumento basta grandi di containernan na Aruba, basa riba circunstancianan cu a surgi na otro paisnan. Esaki, e mandatario ta kere, ta haci cu Aruba ta wordo mira como un pais, ora cu e necesidad presenta, tin e capacidad pa subi e volumen di trafico di carga cu ta wordo maneha den e region aki. "Si nos uza e hecho cu nos ta bay haya un containerhaven nobo cu no ta bay wordo limita door di espacio cu mester crea pa barconan crucero, e lo bay ta algo sumamente positivo pa nos pais."

E trabounan di ampliacion, mehoracion y modernisacion di e dok existente ta hopi avansa y e construccion di e parti riba e haf cu ta na encargo di ASTEC ta cuminsa e aña'ki, calculando cu e haf di container na Barcadera por bay den operacion pa final di e aña'ki.

Door di crea un containerhaven nobo, ta habri espacio, cu e haf di barco crucero ta bira uno hopi mas moderno y miho prepara pa ricibi e cantidad di turista cu ta yega Aruba abordo di un crucero. "E ta brinda nos oportunidadnan hopi atractivo pa conecta e yegada na nos haf cu henter e desaroyo di centro di ciudad, cu creacion y embeyecemento di e area conoci como ‘Welcome Plaza’ dunando e turista un experiencia positivo di Aruba." Prome Minister Eman a agrega cu tur esaki lo contribui na un sociedad hopi mas bunita y moderno.

Expresionnan haci den e articulo aki no necesariamente ta refleha opinion di ArenaPoliti.co