ORANJESTAD - Si tin algo cu Aruba po ta orguyoso di dje ta e avancenan cu ta haci riba tereno di creacion di energia limpi, y principalmente di e Parke Solar grandi na aeropuerto cu su construccion ta den e su di dos fase den aña 2015.

"Na final di e proyecto Aruba lo tin un di e parkenan solar di mas grandi den region," Prome Minister Mike Eman a bisa den su prome conferencia di prensa di aña. Ya caba na e prome parti di e parke ta den operacion, produciendo coriente cu ta wordo bendi cu e compania di coriente ELMAR.

E panelnan ta situa riba e parkeerplaats di aeropuerto y e coriente genera ta wordo bendi cu ELMAR. E construccion di e parke completo ta bou guia di e compania Hulandes Pfixx Solar, den estrecho colaboracion cu e companianan local Albo y Croon Caribe.

Segun e calculacionnan haci, e 14.400 panelnan hunto lo mester genera 3.5 megawatt. Cu e cantidad di coriente produci aki, e ta suficiente pa provee 1.500 cas cu coriente.

E di dos fase di e Parke Solar ta den ehecucion y ta programa cu e trabounan aki lo keda cla pa final di e luna aki.

Cada  un di e 14 mil modulonan solar, por yega na 250 kw den momento peak. E proyecto na final ta cubri 24 mil m2 di e parkeerplaats, consistiendo di shete seccion. Y manera menciona, ta posibel cu e capacidad di produccion po yega na 3.5 MW, o sea 6.4 miyon KWH.

E proyecto aki ta wordo considera door di Prome Minister Mike Eman uno cu ta cuadra cu e mision di su Gabinete pa haci e isla sostenibel 100% (pa loke ta energia) na 2020. Parke Solar ta forma un parti importante di e maneho di energia limpi cu e Gobierno a bin ta trahando riba dje for di 2009. E ta un meta ambicioso pero cu ta programa pa cumpli cu ne. Tur e trabou cu Aruba a bin ta haciendo riba e tereno aki, Prome Minister Eman a percura pa mundo completo ta na altura di dje. Inclusive e maneho di Gabinete Mike Eman II riba e tereno aki, a cay den bon tereno cerca di organisacionnan di Nacionnan Uni cu kier uza esaki como un modelo pa otro islanan di Caribe.

Ta spera cu lo sigui cu un siguiente proyecto di Parke di Panelnan Solar, cual detayenan no ta cla ainda.

Expresionnan haci den e articulo aki no necesariamente ta refleha opinion di ArenaPoliti.co