ORANJESTAD – Espacionan publico ta un di e cosnan di mas grandi den desaroyo di infrastructura fisico cu un gobierno por haci pa percura pa un bon calidad di bida di su ciudadanonan. Esey ta djis un di e beneficionan cu e plan di revitalisacion di centro di ciudad, delinea pa Gabinete Mike Eman ta aporta na Aruba y su hendenan.

Constantemente Premier Eman y Minister di Infrastructura Benny Sevinger ta busca e manera mas eficiente pa ehecuta proyectonan. Recientemente a logra hunto cu DOW, cu ta realisando e trabou di renobacion den Middenweg, un decision cu ta spaar tempo y placa pa pais Aruba.

“E totalidad di e vision ta un Aruba caminda e producto tanto pa esnan cu ta bishit’e, como esnan cu ta biba aki, tin un miho calidad di bida,” asina Minister President Eman a bisa mientras el a bishita e area di trabou patras di Aruba Bank den Caya G.F. Betico Croes. Aki el a cuminda y gradici cada trahado personalmente pa nan contribucion na progreso di e isla.

Ta pa e mesun motibo Gobierno ta continua cu inversionnan den e sector haciendo uzo di loke nan tin presupuesta, pero tambe pa medio di otro canalnan manera Fondo Desaroyo Aruba. Prome Minister a haci mencion di e creacion di fondonan cu recursonan priva y publico, manera ta e caso di Renobacion Aruba N.V. E meta ta pa financia compra y restauracion di edificionan historico pa uzo comercial.

Tur instituto financiero local y tambe APFA ta participa. Gobierno ta contribui pa medio di traspaso di un edificio modelo pa e proyecto. Firma pa establecimento di e fundacion ta programa pa tuma luga den e proximo dos simannan. Di e manera aki Gabinete Mike Eman I y II ta demostra e bon relacion di cooperacion cu ta mantene cu tanto sector social y como comercial.

Tambe mester menciona e caracteristica di versatilidad ora cu ta busca diferente manera pa atrae progreso y bienestar, na luga di wak den un solo direccion cu simplemente ta debilita nos posicion economico. “Un ambiente total di renobacion, paso a pone prioridad pa pueblo y pais na luga di pone prioridad na otro cosnan manera tabata den pasado.” 

Expresionnan haci den e articulo aki no necesariamente ta refleha opinion di ArenaPoliti.co