Trabounan haci pa DOW mes ta spaar placa y tempo pa pais Aruba 

ORANJESTAD – Recuperacion, renobacion y revitalisacion di centro di ciudad ta marchando di un manera satisfactorio danki na e vision y determinacion di Gabinete Mike Eman I y II. Dialuna mainta Minister di Infrastructura Sevinger a inspecciona e trabounan haci den Middenweg. El a expresa cu e resultadonan positivo ta danki na e sosten di henter Gobierno, bon trabou di Infra Team y tambe pasenshi y cooperacion di pueblo. Ta continua awo cu e cayanan paralelo y diagonal di Caya G.F. Betico Croes pa asina caba di crea e centro di ciudad y centro historico nobo pa nos isla.

Despues cu a finalisa cu e parti principal di Caya Grandi, tabata riba peticion di Prome Minister Mike Eman cu a sigui pa e cayanan na banda. Minister di Infrastructura hunto cu Infra Team y Departamento di Obranan Publico, a parti esaki den diferente fase y a delinea un strategia pa su ehecucion.

“DOW a dicidi riba e diseño hunto cu DIP y a tuma varios trabou pa nan mes pa e bay mas lihe y menos costoso; eliminando asina e proceso di destaho publico entre otro ya cu ta empleadonan di DOW mes ta haci e trabou,” asina Minister Sevinger a splica, añadiendo cu “Hendrikstraat bay ariba ta DOW mes ta haci e trabou; nos tin e experticio den cas y e productonan tambe.”

Otro proyectonan mas grandi, manera Schelpstraat, Wilhelminastraat y Welcome Plaza si ta bay cana e caminda pa un destaho publico ya cu ta proyectonan di un dimension mas amplio. “Tin un combinacion pa nos yega na restructura y drecha tur e area di Oranjestad entre trabou cu DOW mes ta haci y esun cu sector priva ta haci. Na final nos lo mester tin un caya cu ta vibrante, un caya cu ta nobo,” segun e titular di Infrastructura.

Adicional na e trabounan fisico, Gobierno tin mas incentivo pa revitalisacion di centro di ciudad manera proyecto di hotel, renobacion di comercio existente y entrada di tiendanan nobo. Tambe tin kiosco y terasanan cu lo aporta na movecion di hende y crea e ambiente cu Gobierno ta desea di mira. Manera Minister Sevinger a bisa, “E ambiente di economia den centro di nos pais ta bay sigui biba den e proximo lunanan y añanan nos dilanti.”

Naturalmente Gobierno di Aruba tin comprension pa e incomodidadnan cu e trabounan ta ocasiona. Minister Sevinger a pidi pa un poco mas di pasenshi. “Tur cos ta pa un miho futuro di Aruba. Mientras tanto, bin caya y bin sostene nos tiendanan den centro di ciudad.”

Expresionnan haci den e articulo aki no necesariamente ta refleha opinion di ArenaPoliti.co