No tin niun factor cu ta influencia desaroyo economico y social mas cu e factor di energia. Cada dia esaki ta bira mas importante. Energia ta haci mehoracion di calidad di bida posibel, ta haci bida mas sigur y haci nos trabou mas productivo. Economia di tur pais ta rekeri mas energia. Especialmente paisnan den desaroyo manera Aruba. Mientras paisnan ta busca crecemento economico, e demanda pa energia tambe ta sigui crece. E unico forma pa na henter mundo nos logra satisface e necesidad di mas energia, ta door di genera y suministra energia di formanan mas eficiente, menos costoso y cu menos daño na medio ambiente.

E demanda pa energia na mundo ta sigui subi te yega 30% mas den e benidero 25 aña. Mientras gas natural y kool ta e dos fuentenan di energia cu ta bay crece mas, e mehoracion den uso mas eficiente di energia, lo yuda reduci e demanda di energia y reduci e impacto riba medio ambiente.
E demanda pa mas energia ta bay rekeri inversionnan enorme y lo rekeri pa usa tur fuente di energia cu ta disponibel.

ARUBA
E meta ta pa yega na un combinacion di fuentenan di energia cu ta SOSTENIBEL a largo plazo. No por depende di un fuente di energia so. Sigur no di peroleo cu  ta bay sigui bira menos. Pa nos cu tin solo, biente y awa na abundancia, e miho alternativa ta pa sigui stimula uso intensivo di e fuentenan di energia di solo, biento y awa di lama y complementa esakinan cu energia di fuentenan manera gas natural y petroleo. Ta pa e motibo aki Aruba a haci bon pa scohe algun aña pasa pa cambia nos fuente di energia gradualmente pa mas energia renovabel di fuentenan manera solo, biento y awa di lama. Ta pa e escohencia responsabel aki, cu Aruba a y ta sigui haya asina hopi sosten y elogio pa a scohe pa SOSTENEBILIDAD riba tereno di energia y pa depende menos di energia tradicional di petroleo. Hopi pais no por n i yega na e desicionnan aki, corda pa cuminsa actua. Pero pa nan mescos cu ta pa nos, tempo ta sigui cana y e presion ta bira mas fuerte.

CONFERENCIA
E Conferencianan di ENERGIA BERDE y di ECONOMIA BERDE cu ta tuma luga e siman aki, ta djies un di e encuentronan di expertonan, ingenieronan, economista, empresario y academiconan, pa intercambia di conocemento, desaroyonan nobo, posibilidadnan y necesidadnan pa inversion riba e tereno aki. Di e reunionnan aki den pasado y awor, lo surgi manera semper, ideanan, negoshinan, inversionnan y proyectonan nobo riba e tereno aki, pa nos y pa otro paisnan.

Expresionnan haci den e articulo aki no necesariamente ta refleha opinion di ArenaPoliti.co