Green Green Green ta Bon Bon Bon pa nos!  

Un di e conclusionnan cu a saca e siman aki di e acuerdo di 195 pais riba limitacion di contaminacion medio ambiente, ta cu awor mester inverti tur cu ta posibel den "energia berde". Esey kier men cu mester reduci e cantidad di energia cu ta saca di petroleo, kool y gas mas y mas. Pasobra ta esakinan ta e causantenan principal cu e temperatura na mundo ta hisa, masanan di ijs ta dirti y e nivel di lama ta subi. Nan ta causa daño irreparabel na medio ambiente y na e clima rond di mundo. E alternativa ta pa uza energia alternativa manera energia cu anda a saca di coriente di awa, energia di biento y di solo. Esakinan ta duradero: nan no ta caba y nan ta garantisa cu medio ambiente ta keda sano. Nan ta garantisa un miho bida pa nos jiunan!

ARUBA
Ta netamente pa e motibonan aki e maneho di energia di gobierno di AVP for di 2010 ta asina importante y progresivo. E ta un maneho cu ta garantisa energia pa semper, na un prijs pagabel y e ta duradero. Ta pesey e maneho aki a haya asina hopi atencion rond di mundo. Pasobra ta poco pais na mundo, a tribi di scohe pa un maneho di energia pa su pais na un forma asina cla. E maneho pa yega na 100% energia cu no ta contamina nos medio ambiente den aña 2020 ta ambicioso. E ta ensera cu combinacion di fuentenan di energia pa asina sigura cu bou tur condicion lo tin energia pa henter comunidad, na un prijs rasonabel y cu ta afecta medio ambiente lo menos posibel. E combinacion of "mix" aki ta inclui energia cu ta genera cu mulinanan di biento, energia cu ta genera cu panelnan di solo, uzo di tecnologianan avansa pa uza awa friew di lama pa fria edificionan, contruccion di edificionan den forma cu ta spaar energia y hopi mas. E conferencia di Paris a subraya un biaha mas cu e escohencia di gobierno di AVP pa Aruba ta e miho cu tin y ta urgi otro paisnan pa haci mescos. E ta nifica cu gobierno d AVP no solamente a pensa riba con pa baha prijs di awa y coriente awe, pero tambe con ta sigura esaki pa tur hende den futuro. Na mes un momento a pensa con miho por contribui na un mundo mas limpi y sigur pa nos jiunan. Cu tur e bentahanan aki pa nos pais y nos futuro generacionnan, ta tristo pa wak cu oposicion (MEP/PDR) na Aruba ta contra di uzo di energia "berde". Nan ta prefera di ta contra algo asina importante pa motibonan politico, cu scohe conciente pa sigura futuro di nos pais.

Expresionnan haci den e articulo aki no necesariamente ta refleha opinion di ArenaPoliti.co