Mientras cu e Sustainable Energy Week ta continua 

ORANJESTAD – Diaranson atardi Minister di Infrastructura, Desaroyo Teritorial y Integracion Benny Sevinger tabatin e honor di clausura e programa oficial di Green Aruba Conference den su di seis edicion. Tabata dos dia di presentacion y panelistanan cu a profundisa den e tema di energia renobabel y sostenibilidad cu e obhetivo di comparti conocemento y experiencia. Minister Sevinger, den nomber di Gabinete Mike Eman II a gradici e participantenan pa nan interes y tambe tur esnan cu a aporta na organisacion di e evento.

‘Green Aruba Conference’ ta forma parti di e ‘Aruba Sustainable Energy Week’ cu a inicia dia 26 y ta finalisa dia 31 di october proximo. Ademas di e conferencia riba sostenibilidad, tambe tabatin e ‘Aruba Learning Event’ (ALE) caminda representantenan di e organisacion SIDS (Small Island Developing States) a bin pa conoce mas di cerca e avancenan di Aruba den su caminda pa 100% di independencia energetico.

Mas di 36 pais ta participando den e eventonan aki y sigur un di e momentonan mas memorabel tabata e mensahe di Bill Cllinton riba e prome dia di e competencia, como tambe e firmamento di contractnan importante entre e companianan local di utilidad y empresanan tecnologia cu ta forma e fundeshi pa mehoracion di nos sistema di produccion y distribucion di awa y energia. No por laga afo e firma di acuerdo pa institucion di un Centero of Excelencia di Nacionnan Uni pa asina di un manera structura comparti e informacion di Aruba cu otro islanan SIDS.

E proximo dianan lo ta dedica na reunionnan di ECLAC como tambe Parlatino, cu tambe lo ta tratando e tema di energia renobabel y e miho caminda pa yega na sostenibilidad y hunto cune progreso pa pueblonan. Aruba por mira atras riba e prome mita di un siman caminda nos isla ta luci pa su vision y cu su forma di traha ta un ehempel pa resto di mundo, y en special, nacionnan chikito ta avansa riba e tereno di un mundo mas funcional y menos contaminante.

Expresionnan haci den e articulo aki no necesariamente ta refleha opinion di ArenaPoliti.co