Prome Minister Eman a accentua e forsa y energia humano di islanan rond mundo 

ORANJESTAD- Den Marriott Hotel e di seis Green Aruba Conference ta tuma lugar unda vision 2020 di Aruba ta un di e topiconan cu ta wordo atende. Esaki ta e meta cu gobierno di Aruba a pone su dilanti pa na 2020 e isla no ta depende mas di petroleo fosil. Den su speech Prome Minister Eman a bisa cu riba e caminda largo pa yega na e meta final 2020, Aruba a cera amistadnan bunita, pero tambe a logra partnership cu institutonan importante den mundo. Banda di Carbon War Room, Rocky Mountains Institute, TNO, Clinton Climate Initiative y ultimamente cu UNDP y IRENA. Persona y partnernan local a haci e diferencia den haci e imposibel bira posibel. Colega Mike de Meza y director di Utilities Hoevertsz, banda di WEB, ELMAR y otronan ta yudando gobierno logra su obhetivo.  

Eman a dedica gran parti di su discurso emocionante, na islanan chikito manera Aruba cu tur e retonan cu nan ta deal cu nan a base diario. Den e sala tabatin hopi representante di islanan cu nombernan exotico y desconoci, manera Vanuata, Samoa, Fiji, Tuvalu pero tambe di e arcipelego Seychellen. “Mi kier papia awe cu mi ‘island people’ for di e mas profundo di mi curazon. Como isla nos no a haya e miho carta di e baraha. Hopi di nos a pasa den colonisacion y sclavitud, tambe nos ta biba riba islanan cu hopi reto y desafio. Economia hopi bes ta basa riba un solo pilar. Nos cuminda ta wordo  importa y nos ta biba riba islanan tanto den Caribe como Pacifico cu ta confronta desasternan natural manera horcan, tyfon y temblor. Nos islanan ta confronta retonan cu ta parti di historia, parti di geografia y tambe parti di destino.” Eman a bisa cu apesar di tur e retonan aki y tambe di un colaps economico cu ta afecta gran parti di e poblacion – manera ciere di e refineria na Aruba na 1986 cu a causa un rebabo di 50% di e GDP y 40% di desempleo. “Esaki ta pasa ora un isla chikito ta haya su mes confronta cu retonan di embergaduranan asina. Asina nos mester deal cu e carta cu nos a haya di e baraha.”

“Den e curazon di nos islanan tin un forsa enorme cu ta surpasa tur e retonan aki. E carta cu nos a haya no tabata e miho, pero Dios a bendiciona nos cu caracteristanan fuerte. Mi a topa awe cu hendenan di Montserrat unda na 1995 e isla casi a wordo bari di mapa door di un vulcano. Hendenan mester a bandona e isla, pero nan a bin bek determina pa reconstrui nan isla.” Eman a menciona Grenada cu a wordo azota pa un horcan cu a destrui 90% di e casnan. Nan tambe a traha dia y anochi pa reconstrui nan isla y drecha nan economia. Prome Minister a menciona Haiti unda un temblor a haci un disaster sin igual na 2010. El a bishita Haiti y a mira pa su mes loke e temblor a haci. “ E hendenan di Haiti ta traha duro pa reconstrui nan pais y nan ta logrando grandemente.” Eman a papia di e islanan den Pacifico cu ta mira e cambio di clima como un menasa serio pa nan. E nivel di lama ta un peliger pa mayoria di e islanan aki. Pero, nan ta lucha duro pa trata di e evita e desaster aki. Nan ta bay mundo rond pa pidi atencion pa nan problema y ta convenci cu mundo ta responde pa nan por keda biba riba nan islanan.

“Nos, habitantenan di islanan, tin algo en comun. Nos ta stima e baranca unda nos a nace y lanta y nos ta determina pa haci tur lo posibel pa reconstui nos isla, pa percura pa nos isla keda manteni den e forma cu e ta. Nos tin abundancia di fuentenan natural cu nos a wordo bendicona cu nan. Nos amor pa nos baranca ta haci nos fuerte pa confronta retonan grandi. Nos ta haci e imposibel bira posibel door di nos flexibilidad y nos forsa determinante. Mi ta spera cu  otro islanan sigui e vision 2020 di Aruba”, Eman a bisa na final di su discurso bunita unda el a accentua cu e energia humano ta nos guia den nos limitacion y vulnerabilidad.

Expresionnan haci den e articulo aki no necesariamente ta refleha opinion di ArenaPoliti.co