VISION 2020 

ORANJESTAD- Diabierna 9 di oktober tabata ‘Dia di Sostenibilidad’. Un dia pa reflexiona y pensa kico mundo kier logra riba e tereno aki. Aruba ta un figura importante pa loke ta e tema sostenibilidad y na varios occasion Prome Minister Eman ta riba plataformanan internacional pa conta di e vision di su isla y su gobierno. Vision di Gabinete Mike Eman ta pa na 2020 e isla ta 100% sostenibel. Un reto ambicioso. Un reto cu ta acapara atencion global. Un reto cu ta bin cu su obstaculonan. Pero bida ta siña nos cu obstaculonan tey pa wordo elimina pa asina pone ‘Vision 2020’ den practica. E caminda ta largo, pero trahando hunto cu un solo meta nos dilanti, nos ta logra yega su fin. Riba dianan di sostenibilidad Gabinete Mike Eman kier a enfoca riba e siguiente proyecto cu ta panelnan solar pa varios scol na Aruba. E prome scol cu ta hayando panelnan solar actualmente ta scol basico Kudawecha. Compaña pa ingenierionan Ras y Everon di WEB NV Prome Minister, hunto cu Minister de Meza a haci un bishita na e scol pa wak pa nan mes con leu e trabounan ta y pa haya un poco mas splicacion di e proyecto, cu ta wordo desaroya den cooperacion cu WEB NV, ELMAR NV y gobierno di Aruba.

“E proyecto aki mester sigui engrandece e capacidad di energia solar cu nos tin na Aruba y e capacidad total di energia alternativa. Nos a cuminsa cu un soño y awe nos ta mira con esaki ta birando mas y mas un realidad.” Eman a splica cu e dia di sostenibilidad ta e occasion perfecto pa bin mira con e proyecto ta bayendo. “Henter e pensamento di usa energia sostenibel ta pa conscientisa tambe e generacion nobo y ta pesey nos ta enfocando riba nos scolnan. Loke e panelnan solar ta genera na energia por cubri loke e scol mes mester. Un iniciativa cu ta haya su continuacion den otro scolnan. “E idea ta pa scolnan cu no tin airco awor por haya esaki door di e proyecto aki.” Eman ta agradecido na su coleganan de Meza y Hooyboer cu den e caso aki ta hunga un rol, respectivamente como minister di energia y enseñansa. “Henter Gabinete a coopera y asina hunto cu WEB nos ta logra pa bay un paso mas den direccion pa haci Aruba 100% sostenibel na 2020.” Eman a bisa cu e siguiente scol ta Filomena College MAVO na San Nicolas sigui pa varios scol mas cu nan dak ta aproba pa por carga e panelnan solar mescos tambe algun edificio di gobierno. MFA Noord ta e prome edificio di gobierno cu ta full cubri cu panelnan solar y Cocolishi ta genera 60% di energia solar.

“Enfoke di ‘Dia di Sostenibilidad’ ta pa henter e pais reflexiona riba e meta grandi di 2020. No solamente pa loke ta energia pero tambe riba tereno social economico. Gobierno a crea un maneho social economico na unda no tin solamente progreso economico, pero tambe bienestar y miho calidad di bida den barionan, di mas sosten di poder di compra di nos conciudadanonan, di un sentido di cohesion social, di comprendimento y solidaridad. Tambe naturalmente riba nivel ecologico.” Un otro pensamento di sostenibilidad ta pa crea mas capacidad pa produci nos propio cuminda.

Expresionnan haci den e articulo aki no necesariamente ta refleha opinion di ArenaPoliti.co