Minister Otmar Oduber durante encuentro cu prensa a elabora riba e diferente decisionnan cu ta tumando den Conseho di Minister pa loke ta e fenomento di ‘turistanan’cu ta biniendo Aruba pa por bay cu Dollars Venezuela.
Siman pasa e mandatario a reuni cu diferente gremio pa mira kico mas por haci y awor e ta haci un apelacion na comunidad di Aruba cu ta huur camber cu no ta regla pa ley of cu ta cumpra productonan for di personanan cu no tin permiso pa bende esakinan pa por fabor no contribui cu esaki.
Banda di esaki, manera Prome Minister a bisa caba, Ministernan Dowers y Sevinger ta anunciando cu lo bira hopi mas streng, lo tin un control hopi mas severo ora hende drenta Aruba, ora nan ta na Aruba y ora nan mester sali.
For di e aspecto di turismo tambe tin diferente pasonan ta wordo tuma y esey tabata e meta di e reunion tambe cu ATIA, Camara di Comercio y Asociacio di Banconan siman pasa unda a mustra esakinan.
“Na nos aeropuerto so nos a bin ta inverti den e ultimo 6 lunanan y e proximo 6 lunanan mas di 4 miyon den mehora nos grens. Den 1 pa 2 siman nos lo ricibi 10 machin adicional di E-Gates”. Minister Oduber a expresa.
Na e parti yegada lo bay tin en bes di 2 un total di 6, mientras cu dos lo bin na e parti salida Mericano y e otro 2 na e parti salida no Mericano. E machinnan aki lo agiliza e proceso di tur e personanan cu tin un paspoort cu chip mientras cu e ta baha e presion di nos imigracion.
Tambe lo bin cu 12 machin di APC, e machinnan cu ta controla paspoort na imigracion Mericano. Na e momentonan aki tin 10 y lo yega te na 22.
Un otro cambio cu lo tuma lugar ta e carchinan cu ta wordo yena ora turistanan yega Aruba pa entrega na imigracion, esakinan lo wordo elimina y e proceso lo bira uno electronico. ATA ta trahando hopi di cerca cu imigracion y ta un proyecto cu ta practicamente cla.
Minister Oduber ta calcula cu den periodo di un aña cu inicia e proyecto piloto, lo por bay completamente over manera e sistema Mericano unda cu adelanta ta aplica y ta wordo prescreen prome cu haya acuerdo pa bin Aruba. E mandatario ta di opinion cu e proceso aki lo bay yuda cu e fenomeno cu tin na e momentonan aki cu algun di e personanan cu ta bin for di Venezuela mirando cu adelanta por aproba of desaproba yegada di un turista na Aruba.
ATA a inverti casi mey miyon den e programa y un ploeg grandi di ATA y aeropuerto ta sosteniendo imigracion, departamento pa cual Minister Otmar Oduber tabatin hopi elogio pa nan pasenshi y e cantidad di trabou cu nan tin ultimamente.
E mandatario a bisa tambe cu pa prome kwartal di otra aña lo bay tin un inversion grandi den restructuracion di henter e area di imigracion. Aeropuerto di Aruba lo bay cambia tur e boothnan y haci e logistica uno mas facil pa tanto usuario como pa esnan cu mester duna e servicio. Igualmente henter e area di douane lo wordo renova y inversionnan lo wordo haci den ekiponan moderno di scanning. Minister Oduber a papia caba cu ATA y aeropuerto pa yuda douane mirando cu e fluho a bira uno hopi grandi mientras cu e cantidad di personal no a sigui crece na e nivel di usuarionan

Expresionnan haci den e articulo aki no necesariamente ta refleha opinion di ArenaPoliti.co