Minister Otmar Oduber tin tur e atencion pa loke ta trata e problematica di erosion di nos beachnan, fenomeno cu a bira mas pisa cu El Niño. Un di e beachnan cu mas a sinti e problematica aki ta esun di Tamarijn Hotel, cu a keda practicamente sin beach.

Diamars merdia gerencia di Divi Resorts hunto cu ATA a realiza un site inspection pa mira e situacion real, Minister Otmar Oduber no por a asisti debi na reunionnan den Parlamento, pero si el a keda pendiente di e inspeccion aki pa tuma e pasonan necesario pa salvaguardia un di nos atractivonan turistico principal...nos beachnan.

CEO di ATA, Ronella Tjin Asjoe-Croes a indica cu tin conversacionnan andando cu Divi for di algun luna caba y e hotel aki ta experiensando e efectonan di El Niño na un manera mas grandi caminda cu na un manera permanente a perde basta beach na Tamarijn.

Teniendo na cuenta cu nos beachnan ta un di nos atraccionnan principal, solucion pa e caso di erosion mester bin di parti di un ATA por ehempel, combina cu inversion di parti di hotel y esey ta e caminda cu ta canando.

A identifica un supplier cu lo por haci e trabou y ta evaluando lo cual a wordo presenta hunto cu ekipo tecnico di Divi, socionan cu ta conseha ATA y naturalmente DOW cu tambe tin un papel importante den esaki.  Cu e proyecto aki lo restablece e beach cu tabatin na Tamarijn y na e manera mas permanente cu ta posibel.

General Manager di Divi Resorts, Alex Nieuwmeyer a indica cu cada biaha e fenomeno di El Niño ta afecta e beachnan di Tamarijn, pero e biaha aki e tabata hopi pisa y a desaparece tur e santo dilanti Tamarijn hibando esaki pa Bucuti y Manchebo. Awor ta pensando riba e solucion di bin cu santo for di fondo di lama pa crea e beachnan atrobe.

Tin un plan caba cu ta wordo discuti cu Gobierno y kier probecha cu tin dos barge na e momentonan aki na Aruba cu por haci e trabou di bin cu e santo for di fondo di lama pa crea e beachnan un biaha mas. Ta bay discuti riba esaki cu Gobierno pa por logra haya e beyeza di beachnan cu Aruba ta conoci pa nan.

Intencion ta pa cuminsa cu e trabounan for di maart caba si por logra finaliza tur e procesonan y detayenan necesario den e luna aki ainda.

Expresionnan haci den e articulo aki no necesariamente ta refleha opinion di ArenaPoliti.co