Prome Minister Eman a presidi reunion riba Zika 

ORANJESTAD -  Prome Minister Mike Eman, hunto cu su coleganan Minister di Salubridad Publico dr. Alex Schwengle y Minister di Infrastructura Benny Sevinger a reuni diamars mainta cu representantenan di diferente departamento pa trata den un forma nacional e problema di Zika.

"E situacion di e virus di Zika tin nos atencion y aunke no tin caso registra na Aruba, nos ta di opinion cu ta miho preveni cu lamenta," Prome Minister Mike Eman a bisa na salida di e reunion cu representantenan di departamento di SERLIMAR, City Inspector, GKMB y DOW.

Prome Minister Eman a bisa cu e tabatin diferente deliberacion cu su coleganan prome cu a yama e reunion nacional aki. Aunke cu Aruba ta bendiciona cu un departamento di GKMB cu ta traha hopi efectivo, cu ta percura pa tin menos caso di Dengue y Chinkinguya na Aruba cu p.e. Corsou y otro paisnan den Caribe, toch e mandatario ta haya cu mester haci algo.

Tur hende sa di e menasa di e virus Zika y aunke no tin indicacion cu Aruba tin un problema cu esaki, "nos mester preveni, pasobra preveni ta miho cu cura, pa cual nos a combersa riba un esfuerso pa  presencia di e sangura aki no bira descontrola, mester bini un trabou nacional. Esaki ta encera trece diferente departamento hunto. Den esaki Ministerio di Asunto General ta responsabel pa trece mas Ministerio hunto pa mira kico nos por haci," Eman a splica. El a agrega cu mester uni forsa y enfoca durante e simannan cu ta bini riba tur locual cu tin di haber cu e virus di Zika.

Manera ta conoci, e virus Zika ta bini di e mesun sangura cu ta causa Dengue y Chikinguya y a wordo detecta pa prome biaha den e mondinan di un pueblo cu yama Zika na Uganda. Su efectonan ta menos pisa, cu keintura leve, dolor di cabez y musculonan, entre otro. Aunke no tin prueba definitivo ainda, ta wordo bisa cu e virus aki tin un efecto riba baby den bariga, y ta causa cu nan por nace cu cabes chikito y cerebro menos desaroya (microcefalia).

E mandatario a bisa cu e kier pa e departamentonan uni forsa y bisa cu ta haci un trabou grandi pa enfoca durante e simannan nan dilanti riba tur locual cu tin di haber cu e virus aki. “E sangura di Zika rond mundo ta hayando hopi atencion y si nos tur pone un enfoke grandi pa combati cualkier tipo di criadero, nos ta exitoso. Nos ta hopi contento cu tur e departamentonan cu nos a invita pa sinta na mesa, a reacciona positivamente cu a haci posibel cu nos por cuminsa cu un campaña nacional," e mandatario a bisa.

Prome Minister Eman a enfatisa cu no tin indicacion cu na Aruba tin algo cu ta fuera di control, pero ta prefera di cuminsa ataca e tema prome cu e bira un problema. "Nos tin suficiente instancia pa yuda nos pa e no bira ni un tema di preocupacion. Tin un gran boluntad pa traha hunto”.

Expresionnan haci den e articulo aki no necesariamente ta refleha opinion di ArenaPoliti.co