Mester pone atencion na e dokter y e paciente 

ORANJESTAD – "Durante mi bishitanan den bario, un di e preocupacionnan cu mi ta encontra den tur cas, ta preocupacion pa cu cuido di salud. Den cada cas nan tin un otro storia pa conta, con decepciona nan ta den e cuido di salud aki na Aruba. Esaki no ta husto, especialmente no pa nos grandinan. Y mas tristo ta, cu nada ta wordo hasi pa mehora e cuido di salud.

Nos a reuni un tempo pasa cu organisacion di dokternan di cas, di specialistanan, y di specialistanan den servicio di hospital. Durante e reunion aki a bin hopi punto padilanti cu ta crucial si kier mehora e calidad di cuido. Dokternan ta trahando bou di un presion enorme, debi na falta di dokternan. Y esey ta condusi na varios otro problema, pasobra ta imposibel cu un dokter cu a traha 7 dia sigi, por duna e mesun atencion y cuido na su paciente.
Esey ta un punto crucial cu AZV y gobierno mester soluciona pa asina cuminsa mehora calidad di cuido.
E falta di dokter ta pone tambe cu pacientenan mester warda hopi largo prome cu wordo atendí. Pesey nos mester soluciona e problema di reconosemento di diploma di nos yiunan di terea cu studia medicina den nos region. Nos mester di nan, pero nos gobierno no kier laga nan traha, y asina nos ta causa "brain-drain" pasobra na otro pais si nan ta wordo ricibi cu brasanan habri.

Calidad di cuido pa partido MEP tin un prioridad hopi halto. No por ta asina cu un hende mester warda mas di 6 luna pa mira su specialista. Nos a spera cu e minister di salud, dr. Schwengle, mirando cu e mes ta un dokter di profesión, lo por tuma e problemanan aki na serio y busca un solucion, pero e tampoco a hasi net net nada pa mehora e calidad di cuido. E ta mas cu dos anja caba minister, pero no tin ningun mehoracion, y esey nos ta lamenta”, líder di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co