ORANJESTAD – Lider di MEP Evelyn Wever-Croes a cuminsa un campanja pa Paradera y Santa Cruz tambe haya un centro medico cu por brinda servicionan medico cu no ta complica. Por ehempel, tuma sanger, coi presion, sala di emergencia, y atende consulta cu specialista. Esaki ta trese cun’e hopi beneficio pasobra awor esnan especialmente di edad halto, ta pasa un caminda di cruz pa nan busca cuido medico.
“Nos filosofía ta pa trese cuido medico mas cerca di e patient. Actualmente tur habitante di Aruba mester acudi na Eagle pa haya cuido medico na hospital, y algún por haya cuido na IMSAN na San Nicolas. Nos deseo ta pa cuido medico wordo hiba mas cerca di e cuidadano. Na e momentonan aki ta na e dos extremonan di nos isla so cuido medico ta wordo duna, na San Nicolas y na Eagle, y ta deseable pa tin un Centro Medico mas central riba nos isla.
Pa e motibo ey nos a lansa e plan pa construi un Centro Medico den area entre Paradera y Santa Cruz.

Durante e ultimo reunion publico siman pasa diabierna, mi a entrega un moción den nomber di fracción di MEP, pa urgi gobierno pa cuminsa cu e preparacionnan. Ta hopi trabou mester hasi prome cu yega asina leew, pero e no ta imposibel. Y mas liher nos cuminsa, mas liher nos ta caba. Si e gobierno aki por haya miles di miyones pa construi carertera, nan mester por haya poco placa pa construi e Centro Medico aki. E plan ta pa mas despues sigi expande y bin cu mas Centro Medico riba nos isla. Y nos ta spera cu e mayoría den Parlamento sostene e proposición aki.

E reunion den cual e fracción di MEP a presenta e moción aki a wordo suspendi, y no a bai na votación ainda. E reunion aki a tuma lugar diabierna siman pasa, 18 di september. Hopi a kere cu e fracción di MEP lo no a presenta den Parlamento, pero lider di MEP a splica cu desde e incidente di 27 augustus cu e ley di CAFT a wordo aproba, nan no ta den Parlamento mas. “It is not business as usual. Bo no ta haya nos sinta den Parlamento mas ta hasi nada. Nos lugar ta den pueblo, pa scucha e dolornan di nos pueblo y pa busca solucion pa nan. Den parlamento mes bo no por soluciona mucho cos, pasobra e poder di parlamento a wordo pasa pa CAFT. Nos lo ta den Parlamento solamente pa temanan hopi urgente, ora cu gobierno kier mishi cu cartera di e pueblo. E ora si nos lo tey, y nos lo lucha cu tur nos forsa pa impedi esaki. Pesey nos a acudi tambe diabierna ultimo, pasobra tabata pa trata e proyecto cuestionabel di hospital, un reunion cu nos mes a pidi un anja y mey pasa.  Pero por lo demás, bo no ta haya nos sinta den airco ta hunga riba Facebook. Esey nos ta laga pa e parlamentarionan di AVP cu tin miedo di cana den pueblo”, según líder di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co