TIN HOPI CAMA BASHI DEN CAS DI CUIDO, MIENTRAS TIN CASI 200 HENDE RIBA LISTA DI ESPERA  

ORANJESTAD – Parlamento e siman aki a trata e ley cu mester introdusi reglanan pa esnan cu mester cuida di nos grandinan. Lamentablemente e ley mes no tin mucho contenido, pasobra e contenido mester wordo duna den e diferente decretonan cu mester wordo traha ainda. Gobierno no por a informa Parlamento ki tempo por spera esey.

Durante e tratamento di e ley riba insistencia di fraccion di MEP, e minister a informa Parlamento cu tin casi 200 persona riba e lista di espera pa drenta den den casnan di cuido pa nos grandinan. Casi 200 hende cu no por keda mas na cas, cu famianan no por cuida mas di nan.

Di otro banda tin cantidad di cama bashi den e diferente casnan di nos grandinan. Segun e minister di salubridad tin hopi cama bashi pasobra falta personal na e casnan di cuido. Pa motibo di falta di personal e casnan di cuido a stop di tuma nos grandinan, y a cuminsa verhuur e casnan aki cu studiante hulandes.

E situacion aki ta totalmente inaceptable pa e fraccion di MEP. Pasobra e problema ta sinta den e prioridadnan di gobierno, no tin placa pa tin mas personal pa cuida di nos grandinan, pero si tin placa pa traha green corridor, cabay blauw, biahamento y fiestamento. Pues, pasobra e gabinete Mike Eman ta malgasta tur placa di pueblo, no tin placa pa busca mas personal pa cuida di nos grandinan, siendo cu tin hopi persona desemplea cu por ocupa e trabounan aki.

"Mi ta lamenta esaki profundamente, pasobra e ta mustra atrobe e prioridadnan equiboca di e gobierno. E ministernan di gabinete Mike Eman ta papia henter ora di mehora calidad di bida di nos grandinan, pero ora di mustra cu hechos, e gobierno ta laga hopi di desea. Nos tin intencion di hasi e cambionan necesario den e presupuesto cu bin Parlamento proximamente, nos lo kita placa for di e gastonan di luho di e ministernan di Gabinete Mike Eman pa pone e placa akin a e fundacionnan cu ta cuida di nos grandinan pa nan por tuma mas personal den servicio y asina duna nos grandinan e cuido digno cu nan merese" segun Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co