Ta tempo pa stop di papia y cuninsa actua!  

ORANJESTAD - "Un otro green conference a bin y bai. Un cantidad di MOU a wordo firma atrobe pero te cu ainda den 6 aña di tempo no tin ningun resultado. Remarcabel ta cu e interes mes di parti prome minister Mike Eman tawata uno swak durante e ultimo Green Conference. Ora bo mira su speech bo ta mira un persona cansa y cu no ta kere den su propio palabranan mas. Mi ta dun'e rason pasobra e tin 6 anja ta conta mesun storia, 6 anja di energia berde siendo cu su accionan ta lo contrario. 

Tur mucha cu ta bayendo scol secundario y cu ta sinjando kiko ta sostenibilidad sa cu esaki ta basa riba tres pilar: Bo hendenan, bo finansas, bo medio ambiente. Un pais ta sostenibel si su hendenan no ta biba den pobresa, si su finansas ta na ordo y si e tin leynan pa protehe medio ambiente. Mike Eman no a percura pa ningun di nan. Endeuda bo pais, bou di e capa GREEN no tin nada di haber cu sostenibilidad, e ta puro manipulacion. 

Hecho ta cu bo no por papia di sostenebilidad mientras bo pueblo ta pober y bo pais no ta sano financieramente. Bo no por destrui medio ambiente y jame sostenibel. 

Nos di MEP ta kere den sostenibilidad pero basa riba e tres pilarnan: nos hendenan, nos finansas y nos medio ambiente. Ban traha hunto pa hasi Aruba un pais realmente sostenible. 

Ban percura pa eradica pobresa, yuda esnan cu awor ta biba den pobresa pa nan haya trabou, pa nan haya cas social, pa mehora calidad di ensenjansa pa nos muchanan, pa un cuido di salud digno; den corto, pa nos hendenan tin un bon calidad si bida. 

Ban percura pa nos finansa ta na orden, y stop di endeuda nos yuinan y nan yiunan cu proyectonan inecesario. Ban hala faha mara y para gastonan di luho, di fiesta, di biahamento. Ban stop di bin cu proyectonan cu ta costa miyones sin cu nos sa con nos lo paga p'e! 

Ban percura pa un ley di medio ambiente pa protehe nos medio ambiente di berdad. No solamente un parti chikito di dje, energia limpi. Proteccion di medio ambiente ta inclui hopi mas. E ta cuminsa cu un ley pa proteha nos medio ambiente, y pa impone sancionnan severo contra esnan cu ta susha nos pais. Nos cada un por cuminsa, cu accionnan chikito manera limpiesa di nos beachnan, di nos barionan. Nos por hasi uso di panelnan solar na nos casnan.  Sostenebilidad ta inclui proteccion real di nos medio ambiente, y pesey e di dos parke di molina di biento no por bin na e lugar cu gobierno kier pasobra bo no por destrui e parti di naturalesa mas grandi riba nos pais, bou di e capa di sostenebilidad. 

Ya hopi anja a bai na papia. Awor ta tempo pa cuminsa tuma accion pa logra un pais realmente sostenibel, cu ta brinda oportunidad, bienestar y prosperidad na nos yiunan y nan yiunan" ta palabranan di lider di MEP Evelyn Wever-Croes

Expresionnan haci den e articulo aki no necesariamente ta refleha opinion di ArenaPoliti.co