Nos pais a wordo gobernan pa hendenan cu a perde tur clase di nocion di realidad. Nan a scohe pa gasta placa, manda nos pais bancorta, destrui cartera di pueblo y kere cu ningun dia mester paga bek e debenan cu nan a crea. Lamentable di henter e situacion cu a wordo crea pa Mike Eman y su gobierno ta e hecho cu e fiesta pa nan ta sigui y pueblo mester sigui paga pa e fiesta aki caminda e pueblo mes no ta invita. Gobierno mes no ta dispuesto di reduci gastonan inecesario pero si ta dispuesto pa sigui castiga y masacra nos pueblo cu medida.
Gobierno no ta tene compasion cu ningun hende basta nan haya placa pa sigui derocha y basta nan fiesta por continua. Nos pueblo a wordo azota cu medida tras di medida y actualmente nos pais a yega un extreme cu e costo di bida a bira asina halto, e poder di compra a bai asina atras cu ningun hende, ni pueblo ni comercio por absorbe mas medida.
For di basta tempo gobierno a bai di acuerdo pa castiga pueblo cu medida. Mike Eman a bin cu 24 medida y manera cu esaki tawata poco nan ta preparando awor e introduccion di Algemene Bestedings Belasting di 8% den e reforma fiscal. E reforma fiscal ta un palabra bunita cu ta wordo usa pa pueblo no compronde cu ta medida tin na caminda. Gobierno ta bai sconde tras di e reforma aki pero e pueblo mester ta hopi alerto pa e wega sushi aki. E ABB di 8% cu lo mester bin na vigor na januari 2016 lo caba di emprobrece nos pais y destrui esaki. Ta bon pa informa cu e ABB ta un impuesto cu ta wordo cobra riba tur tur servicio y ta diferente na BBO. Por ehempel ABB lo bai wordo cobra riba tur polisa di seguro. Un famia normalmente tin un seguro di bida, seguro di cas, seguro di auto, seguro di viahe, algun tin seguro medico. Riba tur e polisanan aki ABB lo bai wordo cobra y actualmente BBO NO ta wordo cobra riba e polisa di seguro. E BBO cu a wordo introduce den pasado no tawata conta pa productonan di primera necisidad. Contrario na BBO e ABB lo bai conta riba tur e productonan aki tambe. E pueblo aki ta bibando den angustia con e ta sobrevivi. Mayornan tur dia ta man na cabez di unda ta haya placa pa cumpra cumindanan pa nan yuinan, cumpra panja pa nan por bai scol y atende cu e gastonan mensual di cada famia.
ABB di 8% ta bai causa un inflacion grandi riba nos pais. Esaki kiermen pobreza y problemanan social na Aruba. Pueblo cu a perde hopi di poder di compra durante e ultimo 6 anjanan aki lo bai perde hopi mas. Negoshinan ta bay haya nan mes den dificultad.Hopi comerciante awe ta maneha nan negosgi day pa day, paycheck to paycheck pasobra no tin otro manera.
Nos hendenan ta bai perde entrada y cai atras cu fianzanan personal y hipoteca di cas, fianzanan di auto. Nos ta aderti Mike Eman pa econsequencianan di ABB. Mike Eman NO tin  e compasion pa pueblo cu e la priminti, no tin e determincacion pa mehora e calidad di bida y sirbi nos pais manera cu e la priminti. E realidad awe ta otro, e realidad awe ta un pais den deterorio, un pais pober, un pais cu pobreza creciente y simpelmente un pais out of control!

Expresionnan haci den e articulo aki no necesariamente ta refleha opinion di ArenaPoliti.co