Den un declaracion di e siman aki e minister di Salud un biaha mas ta pidi mas tempo pa e "feitenonderzoek" entorno di e cambernan di operacion, pasobra e Raad van Toezicht ta pidi esey.
Den un articulo anterior ya caba nos a mustra cu e RvT aki NO tin ni e autoridad moral, ni e experticio pa haci esaki.
E RvT aki ta consisti den su gran mayoria di hendenan cu no tin e capacidad pa haci dicho investigacion, y esakinan ta "muchanan manda" di e minister.
Y con bo por investiga bo mes?

Si e RvT aki a haci su trabow drechi, for di un principio nan mester por a haya "inzage" di tur documento, y eyden nan mester por a mira cu tin hopi corupcion den henter e proyecto, y cu e grupo frances for di
principio a mustra riba e hecho cu e cambernan di operacion actual no ta cumpli mas cu e rekisitonan moderno. Y si nan a haci nan trabow drechi, for di principio nan lo mester a mustra e minister cu loke a pasa, no ta corecto, pero nan a scohe pa keda keto, loke cu ta haci cu nan no tin e autoridad moral pa conduci e "feitenonderzoek" aki.

Su mesun muchanan manda den e Raad van Toezicht actual a pidie pa ta mas prudente den su declaracionnan,  sinembargo aki un biaha mas "the big boss" ta mustra su inprudencia y falta di etica dor di na un manera cobarde mustra dede riba e Raad van Bestuur (ex-directornan) anterior, sin cu e investigacion ta cla mes ainda.

Hopi ta puntra cu si e tin tanto boca grandi asina, dicon e no ta menciona nomber? Kiko bo tin di sconde?? Miedo di kiko of di ken bo tin?

Ya cu e no kier menciona nomber di e directornan anterior, mi lo menciona nan nomber, pasobra ta mustra cu e minister aki ta purba di "cover up" pa nan, mescos cu e ta purbando di haci cu dr.Ponson, dr. Daryanani y dr. Jaramillo.
E tres directornan anterior ta dr. Boesten, dr. Jaime Falconi y sr. Theo de Koole.
Dicon no ta menciona nan nomber??
Dicon bo ta proteha nan asina tanto?
Y dicon no por ta cu e Raad van Toezicht tambe ta culpabel? Of pa nan tambe bo kier haci un "cover up!??
E contesta riba e preguntanan aki ta hopi facil.
E cobarde aki sa cu e ex-directornan aki tin un "geheimhoudingsplicht", y nan no por defende nan mes.

Y e ta sigui na un manera hopi baho y cobarde sigui mustra dede sin menciona nomber, pasobra e sa cu e ora ey nan lo no por kibra nan "geheimhoudingsplicht" y defende nan mes. Un acto asina no ta pas pa un minister.
Ta p’esey nunca ningun di esnan cu dede ta mustra riba nan, esta dr. Boesten, dr. Falconi ni Theo de Koole, no ta sali afo y defende nan mes pa e acusacionnan serio cu e cobarde aki ta haci den nan direccion.

No a bira tempo pa pueblo haya claridad den henter e asunto aki y laga un instituto imparcial haci un "feitenonderzoek", no solamente riba e camber di operacion, pero riba henter e procedura cu a ser hiba, cu a conduci cu a otorga e proyecto na un grupo mafioso di Miami?
Y nos ta convenci cu den un investigacion imparcial y serio, lo invita e ex-directornan aki pa bin duna cuenta. Mi ta sigur cu e Raad van Toezicht actual no a ni pensa pa invitanan pa bin duna cuenta.
Atrobe e minister cobarde aki ta bisa cu Raad van Toezicht ta dispuesto pa bin duna tur informacion.
Aki lo bay sosode mescos cu ora den parlamento e cobarde aki a bisa cu boca grandi cu SOGA lo duna "inzage" na ken cu kier??
Wel, te awe UPP ta wardando riba SOGA pa nos por bay pa wak den TUR documento pa nos mustra cuanto corupcion tin y desenmascara Frensel Giel, John Hodgson y tur e otronan involvi den e proyecto corupto di renobacion/expansion di HOH.
E minister cobarde aki ta mustra su cobardia, pasobra e sa cu den un investigacion serio lo sali afo kendenan ta e culpabelnan mas grandi, y nos ta convenci cu esunnan cu sigur cu lo bay sali como e culpabelnan mas grandi lo ta su propio coleganan Eman,Visser y Sievinger, su propio hendenan den Raad van Toezicht anterior, Frendsel Giel, John Hodgson, Infra-Team, e grupo mafioso Bermello, etc. etc., y e sa tambe cu - mencionando nomber di e tres ex-directornan aki, nan lo por pone nan "geheimhoudingsplicht" un banda y defende nan mes y duna cuenta di kiko a pasa exactamente den henter e proceso aki. Y mi ta sigur cu hopi puito lo sali.

Tur esaki UPP ta haci den cuadro di nos principio di "Good Governance", na unda mester tin transparencia y "accountability". Y esaki mester conta pa tur instancia, y particularmente ora ta toca fondonan publico.

Cu e minister aki ta mediocre y egoista, nos sa caba.
Nos no mester lubida cu dia cu AVP casi a dune su "bonjour", ela abusa di su poder y nenga un yiu di tera pa bin traha como longarts aki na Aruba.
Aki nos por papia tambe di conflicto di interes, pasobra e ta pone SU interes personal na prome lugar. Aki e pueblo di Aruba ta corre peliger tambe ora cu un minister en bez di pone 100% concentracion riba e salud di e ser humano, e minister cobarde aki tin e problema di gobernacion na cabez.
Ta p’esey UPP ta haci un peticion publico na e minister cobarde aki cu ta acusa e tres directornan di ta culpabel pa e actonan aki, pa bin padilanti y manera un homber y manera e superman cu e ta play den medionan di comunicacion, menciona nomber, mescos cu ami a menciona nomber di esnan cu e minister cobarde aki kier a tapa pa nan actonan inapropia.

Mi no ta kere cu e interes di e pueblo aki ta wordo sirbi cu e minister cobarde ta keda mustra dede sin menciona nomber y cu ta pone cu e directornan ariba menciona no por defende nan mes.
Con cobarde mas bo por ta!?

Den nomber di Union Patriotico Progresista – U.P.P.
Candelario A. S. D. - Booshi - Wever
Brazil, november 11, 2015

Expresionnan haci den e articulo aki no necesariamente ta refleha opinion di ArenaPoliti.co