Pueblo di Aruba, tin persona cu riba kico cu nan pone nan man riba dje, e ta transform’e den oro. Di igual manera, tin persona cu riba kico cu nan pone nan man riba dje of den dje, esaki ta caba na nada! Un bon ehempel di e ultimo aki ta e maneho gubernamental di sr. Michiel Godfried Eman. Su persona ta coba tur caminda pa saca placa pa sacia su adiccion di gasta cu no ta di dje. Ehempelnan ta su mesun negoshinan di ATV y EMCO. Ta via Interbank (Bermudez?) mester a ‘presta’ 2 miyon pa scapa cara y despues BOEK AF e prestamo aki via FCCA (Hoevertsz?). SVB tambe ta un ehempel. Na 2010 SVB su reserva tabata mas halto cu 200 miyon florin. Na 2011 esaki a baha cu 40 miyon, na 2012 otro 40 miyon y na 2013 esaki a baha cu 20 miyon florin. Eman a lag’e na werki. WEB tambe ta un bon ehempel di cu ora sr. Eman pone man riba dje, ayo Aruba! WEB tur tempo tabata draai satisfactoriamente, te ora cu sr. Eman a yega y cuminsa pone man riba esaki. Traha e conexion di tuberia for di WEB pa ECOGAS, WEB ta paga! Sponser na ordo di dia ta e Green Conferencenan. Ta WEB ta paga mas cu 6 miyon florin. Eman a permiti hedging den un forma di bobedad di marca mayor. WEB den rood pa 26.5 miyon florin na fin di maart 2015. Un hedging reserve negativo di 134.5 miyon florin ilustrando e perdida a consecuencia di e contract di Hedging. Bon trabao? Pueblo por recorda con e presupuestonan di pais Aruba nan trayectorianan tabata bao Gabinete Eman 1 y 2? E fundacionnan manera Casa Cuna, SABA y tur otro tambe no por a keda afo. Tur placa a wordo ranca for di nan door di sr. Eman. Cu placa cu no ta di dje, e ta paga un monton di hende como coordinador p’asina esakinan cana rond di su persona y haya esakinan manera catibo, vota pa su persona ora tin eleccion. Con ta paga nan atrobe? Cu placa di pueblo naturalmente! Pa corona e obra di sr. Eman, su gobierno ta ricibi un trofeo den forma di un KB di Gabinete Hulandes na 2014. E deroche, sin misericordia di placa di e pagado di belasting di Aruba, ta claramente comprendibel pa cualkier hende cu un tiki sinti. Tur instancia financiero a informa e pueblo di Aruba cu e forma con Aruba ta wordo maneha financieramente pa sr. Eman ta di un forma abnormal. Su gobierno a pone su mes bao curatela. Normalmente no ta un adicto ta wordo poni bao di curatela?
Facilmente sr. Eman ta bende e autonomia financiero di Aruba cu Hulanda dia 27 augustus ultimo. Kico cu e por bende, sr. Eman ta bende contal e por keda na poder pa haya y gasta placa di e pueblo. Eman a fia na un banco na Aruba, e banco cu ta compronde e choller financiero, mas cu 285 miyon florin. Tur esaki ta trece mi na e comparacion mas competente pa sr. Eman, cu si sr. Eman tabata adicto na droga (un choller) su persona tambe lo tabata horta koper pa bay bende. Lo bo por a wak sr. Eman ta cana ta lastra tubonan di koper pa e bay bende, contal e por sacia su adiccion! E lo coy tur e koper di Marisol Building, di ATV, di EMCO y di e oficinanan di gobierno! E lo a bende tur e cabaynan blauw di Otmar. E lo a kibra e parkeermeternan y saca e placa. Tanten cu e propio pueblo no bisa “TA BASTA” y laga pone minister Eman bao curatela via Parlamento di Aruba, e adiccion pa gasta placa di e pueblo pagado di belasting tampoco lo no caba! ”Ate ta lastra tubo di koper bay cun’e!”

Expresionnan haci den e articulo aki no necesariamente ta refleha opinion di ArenaPoliti.co