Pueblo di Aruba, a yega e momento pa trece padilanti, den un forma concreto y dogmatisa, con sr. Mike Eman ta tratando y ta manipulando cu stimulacion di e economia di Aruba. Esaki no presenta den un forma politico pero como un aporte pa amplia e conocemento di e pueblo di Aruba riba e materia aki. Asina e pueblo por husga debidamente pa su mes y haya sa unda e ta para! Sr. Mike Eman siguramente ta aparenta di ta promoviendo e economia di Aruba, door di laga varios proyecto bay door na e mesun momento, e.o. e proyecto di hospital nobo, waf di Barcadera, waf na Oranjestad, e vierbaansweg Green Corridor y varios otro. Esakinan ta cay bow di e proyectonan PPP, cu ta un afiliacion di negoshi entre sector priva y gobierno! E suma  total di e proyectonan ariba menciona, lo bay costa pueblo di Aruba mas o menos 1.4 biyon florin (1.400.000.000). Definitivamente esakinan lo bay genera trabow, pero na ki prijs y a costo di kendenan esaki  lo sosode y con e pagamento di e debenan haci lo bay ta? E pregunta di oro aki, mester wordo contesta cautelosamente, pa un y tur por haya comprondemento debido den esaki. Ta e propio pueblo ta bay paga pa crea economia di Mike, door cu sr. Mike Eman ta bay cobra e propio pueblo e placa inverti, mas e interes y mas e ganashi di e partnernan. Mas aun, den un tempo stipula e pagonan tin cu tuma lugar sino Aruba ta cay atras den su rating financiero. E pueblo lo bay bira mas pober door di tin cu paga sin haya nada financieramente a cambio! E unico cu enberdad lo sali grandemente beneficia economicamente, ta esnan cu ta bay inverti hunto cu gobierno. E inversionistanan amigo di gobierno, kendenan ta bay fia placa na banconan den exterior pa eherce e proyecto. No mester laga afor esnan directamente liga na e gobierno, cu tin comision di haya di cada proyecto pa nan mes y pa campaña politico. Sr. Eman tin un ideología di pomp placa den e economia den forma di Debe, y no worry pa futuro. Esaki den concordancia cu e filosofia di sr. Paul Krugman, kende ta promove e idea aki di gran forma.  Pa pueblo sigui evalua corectamente, puntra boso mes cuanto placa e pueblo lo bay haya di e proyectonan aki? Di e caminda di Green Corridor, cuanto placa Aruba (abo) ta bay haya como rentabilidad di inversion? Net nada!! Di e proyecto di waf na Barcadera, cua partner ta bay haya mas placa di e entradanan? Di cual partner e grua lo bay ta y pakico? Di e proyecto di e hospital nobo, cuanto placa Aruba (abo) ta bay haya? Dicon a scoge pa e bid di mas caro y pa malo a lubida e sala di operacion? Kendenan ta bay paga pa e proyecto pa mas cu 20 aña, cu ta bay totalisa alrededor di 950.000.000 florin? Hospital di 5 strea, cu abo lo bay uza cuanto biaha, pa cual AZV tambe lo bay hisa su cobranza na e pueblo considerablemente? Te ainda no tin ningun proyecto di cual pais Aruba realmente ta bay beneficia financieramente di dje. Algo manera un refineria di Valero of otro proyectonan cu inversionnan di afor pero cu ta laga e economia florece di berdad. Saca boso propio conclusion, cua di e proyectonan ta bay trece divisas cu realmente ta keda Aruba? No tin ni un proyecto di berdad (no di fantasma manera esun cu sr. Mike ta papia di bende conocemento), manera di produccion of servicio cu lo trece divisas aden pa pais Aruba.  Conclusion: sr. Mike Eman ta trece e proyecto, pone pueblo paga pa e proyecto, pueblo ta haya ni un florin, a cambio pueblo ta bira mas pober door di paga cobransanan halto liga na esakinan y solamente e inversionista ta haya placa den su saco. Esaki ta e circulo economico vicioso estilo di “the economic hitman” di Sr. Mike Eman, cual lo haci di Aruba un pais unda pobreza lo reina p’asina e pueblo keda depende di e politico pa nan por biba y sr. Eman keda na poder pa semper.

Expresionnan haci den e articulo aki no necesariamente ta refleha opinion di ArenaPoliti.co