Serlimar no ta cla pa manda cobransa oficial pa recohe sushi

Durante e reunion di e Comicionnan di Inovacion y Infrastructura hunto cu Ministernan De Meza y Sevinger nos a wordo informa cu Serlimar ainda no ta cla pa por manda cobransa oficial pa recohe sushi. Segun Minister Sevinger esaki ta debi na e hecho Serlimar ainda no ta dispone di un database pa por sa ken mester wordo cobra si of no. E mandatario a informa cu asina mes tin 900 persona cu a acudi na Serlimar y a paga pa e servicio di recohe sushi di Serlimar na un forma voluntario.

Mester remarca cu nos a haya informacion cu Serlimar no a keda cla cu e cobransa debi na e hecho cu algun persona liga cu Serlimar lo kier a lanta un NV y via e NV aki haci e cobransa pa Serlimar. Via e construccion aki esnan tras di e NV por gana un comicion for di cada cobransa cu wordo haci. Sinembargo e plan aki pa un of otro motibo no a keda cristalisa. Esaki parce ta e motibo real pakiko te ainda nada a wordo haci pa e cobransa oficial di Serlimar pa recohe sushi.

Debi cu den e reunion di Comicion ta un ronda di pregunta so tin, nos no a haya chens pa puntra Minister Sevinger riba e veracidad di e informacion recibi. Pero den e dianan nos dilanti nos lo manda puntra e mandatario pa e duna un splicacion kiko ta e motibo real cu ainda no tin un cobransa oficial y kiko ta para di e 900 paganonan cu a wordo haci na un manera voluntario sin cobransa oficial di Serlimar..

19 februari 2015

Expresionnan haci den e articulo aki no necesariamente ta refleha opinion di ArenaPoliti.co