E aña aki e consul a scoge Aruba pa celebra aña nobo. 

ORANJESTAD -  Despues di e bishita reciente di e Embahador di China, diamars den oranan di mainta tabata cerca Prome Minister Mike Eman Consul General di Republica Popular di China, Chen Ziman, staciona na Corsou.

Sra. Ziman a splica cu su trabou ta pa cubri e seis islanan Hulandes den Caribe, mientras cu su oficina principal ta na Corsou. E diplomatico a conta cu su bishita na Aruba ta relaciona cu e aña nobo Chines y mirando cu durante su bishita anterior ya caba a combersa hopi ameno cu e mandatario, el a dicidi pa bin celebra e aña nobo aki na Aruba.

El a splica cu e oficina di Consul General a habri su portanan na september ultimo y esaki ta exigi di su persona como esun responsabel di e sede aki, pa pusha pa un relacion mas estrecho comercial y di amistad entre China y e islanan Hulandes di Caribe. "Mi ta spera cu di ambos banda nos por traha pa reinforsa e cooperacion. Aruba ta un isla bunita, cu un industria turistico cu ta desaroya hopi rapido," sra. Ziman a bisa.

E diplomatico tabata hopi impresiona cu e plannan y tur loke cu pais Aruba a haci caba riba tereno di energia renobabel. "E plan pa 2020 ta hopi bon y tambe e Zona Liber. Mi ta kere cu tin hopi potencial pa un cooperacion di ambos banda, entre otro den sector di telecomunicacion, desaroyo economico, industria turistico, infrastructura, Cultura, Educacion". El a splica cu como Consul General e ta un sorto di mediador, pa ambos banda cerca conoci y conecta cu otro, pero tambe bishita otro.

Di otro banda el a señala cu desde cu a habri e Consulado oficialmente den luna di september, a emiti caba 200 visa pa ciudadanonan local. "Mi ta spera cu den futuro Aruba por organisa un mision comercial pa bishita China y cu comerciantenan Chines tin chens di bishita Aruba, y conoce otro y traha riba un bon cooperacion.

Expresionnan haci den e articulo aki no necesariamente ta refleha opinion di ArenaPoliti.co