ORANJESTAD- Diabierna den oranan di atardi Prome Minister di Aruba Mike Eman a biaha pa Uruguay na unda e ta representa Reino Hulandes y Luxemburgo na instalacion di e Presidente nobo di Uruguay, sr. Tabare Vazquez-Rosas, dia prome di maart 2015. Durante su biahe pa Uruguay Prome Minister ta wordo compaña pa director interino di DBB (Dienst Buitenlandse Betrekkingen) sr. Edwin Abath. Un biaha mas Hulanda, como muestra confiansa ta asigna Prome Minister Eman como su representante na un instalacion asina importante como esun aki.

Sr. Tabare Vazquez-Rosas ta un politico pa hopi aña, kende a studia medicina y tabata e di 39 President di Uruguay durante e periodo 2005-2010. E ta miembro di e partido izquierdista di coalicion Frente Amplio. Prome Minister Eman ta probecha di e oportunidad di ta na Montevideo pa tene reunionnan importante cu ta na beneficio di Aruba, tanto riba tereno gubernamental como comercial y otro areanan. Prome Minister Mike Eman ta bek na Aruba na inicio di otro siman.

Expresionnan haci den e articulo aki no necesariamente ta refleha opinion di ArenaPoliti.co