ORANJESTAD – “Esaki ta e prome Minister cu a bin den mi bario. Ni un Minister mi a yega di mira den mi bario,” asina Maria Maduro a comenta como un habitante di e compleho di Seroe Patrishi ya pa 16 aña caba. Testimonionan similar ta comun pa haya durante e bishita cu Minister President Mike Eman ta haci hunto cu e programa di Accion di Bario, tur diahuebs, cada bes den un otro skina di nos isla. Esaki ta un formula cu ta beneficia ambos partido pasobra e contacto y acercamento ta sirbi como un intercambio di informacion importante den e maneho di nos pais, segun Premier Eman ta splica.

“Ciudadanonan durante hopi decada a custumbra di wak politiconan den tempo di eleccion. Mi ta kere nos a haci un cambio grandi dor di haci un esfuerso pa durante henter aña bay ta accesibel pa e ciudadano por expresa su mes,” segun e mandatario. E ta admiti cu tin problema cu e no por soluciona sea paso no ta den su man of ta algo hopi personal, sin embargo esey no ta desanima Prome Minister Eman. “Hasta asina nos ta saca un man y duna un guia y asina tambe bo por yuda un persona sali di dje. E importante ta pa e ciudadano sa cu e tin acceso, cu e tin un hende pa scuch’e y tin instancia pa scuch’e y esey ta loke nos ta purba haci cu Accion di Bario.”

Ta masha importante pa Gabinete Mike Eman cu e ta un Gobierno cu ta accesibel pa e ciudadano dor di ta presente, tuma un zundra ora cu mester y scucha e keho y deseonan. Na mesun momento, esaki ta sirbi pa keda hopi consciente di kico ta e retonan diario di un famia na Aruba den un bario humilde. “Den e maneho cu nos a stipula, hopi biaha nos ta tende critica y discusion den Reino paso segun nan cu mester tuma medida” Premier Eman a señala, na loke e ta contesta: “E hendenan cu ta papia e cosnan ey mester cana un tiki den bario pa sa cuanto retonan e famianan tin caba, pa bo sa ora cu bo tuma decision bo mester ta hopi cauteloso pa no afecta e fibranan fragil di existencia di famianan cu ta biba na margen den nos pais.”

Hopi aña Gobiernonan a yega y introduci medida manera BBO y aumento di invoerrechten. Aunke e mandatario ta reconoce cu tur Gobierno ta hay’e forsa pa busca mas entrada y baha gasto, antes esaki a sosode sin ningun comprension pa e necesidad pa esnan mas vulnerabel den nos sociedad. “Pesey dia nos a haci cambio den AOV/AZV cu mester a paga un tiki prima, nos a bin cu reparatietoeslag paso nos ta compronde cu famia cu ya ta biba na margen, no tin tanto pa paga. Esey ta e diferencia di nos Gobierno, ta e forma di atende cu e situacionnan di na manera responsabel pa finanzas publico y economia, pero na mesun momento na un forma humano tambe cu e pueblo por carga hunto e retonan cu nos pais ta confronta.”

Pa Prome Minister Mike Eman ta hopi cla y presente den su mente cu solamente ora bo ta cana den e pueblo tur siman, bo por sinti, bo por scucha y bo por mira pa tuma decisionnan importante. “Pesey pa mi, e dia aki di tur diahuebs ta hopi importante mescos cu diasabra ora nos ta drenta e bario pa yuda drecha e calidad di bida. Nos ta contento cu ta haya ciudadanonan manera hobennan anima ta forma parti di traha pa un miho bario pa nan mes y pa Aruba. Nos ta contento cu e ciudadano ta reacciona positivo riba e programa di pasa tur diahuebs den un bario.”

Expresionnan haci den e articulo aki no necesariamente ta refleha opinion di ArenaPoliti.co