ORANJESTAD – Minister di Infrastructura, Desaroyo Teritorial y Integracion Benny Sevinger ta sumamente contento di tabata esun honra pa ricibi e premio otorga na nos isla dor di National Geographics. For di Berlin, caminda e ceremonia di entrega a tuma luga, Minister Sevinger a manda su palabra di pabien na pueblo di Aruba cu e logro aki y na coleganan di Gabinete Mike Eman I y II. “Henter pueblo por ta orguyoso di e premio aki cu ta mustra cu Aruba ta canando den e bon direccion pa loke ta sostenibilidad,” asina e Minister a expresa.

E premio den e categoria di Destination Leadership ta un di cinco cu ta forma parti di e World Legacy Awards y cu a keda entrega durante e famoso Feria Turistico di Berlin cu ta tuma luga anualmente. Minister Sevinger a splica cu Aruba a forma parti di 260 candidato for di cual a scoge tres finalista pa cada categoria. Un panel di 15 hues a evalua cada finalista y a bishita nan pa wak personalmente si nan ta cumpliendo cu loke a pone riba papel como metanan. E otorgamento di e premio ta prueba cu Aruba tin un Gobierno cu ta cumpli cu loke ta priminti.

“Pabien na Prome Minister Eman pa e vision ey, na coleganan de Meza y Oduber y tur otro colega cu a traha riba e vision aki. Awe bo por mira cu National Geographic cu ta un organisacion mundial, ta duna reconocemento na e vision aki y na e pueblo di Aruba pa sostene e vision aki pa 2020 nos ta 100% sostenibel,” asina Minister Sevinger a comenta bisando adicionalmente cu mes importante ta cu Gobierno ta traduci e sostenibilidad aki den calidad di bida pa tur ciudadano.

Sosten di socionan grandi manera Carbon War Room y TNO, entre otro, tambe ta sumamente importante, segun Sevinger. Nan ta reconoce cu Aruba tin un vision valioso, pero tambe e conocemento y capacidad pa haci’e un realidad y pesey tambe paisnan grandi ta wak den direccion di Aruba. “Esey nan ta admira di pais Aruba cu a pone un vision asina halto su dilanti, pero cu tambe ta canando su caminda,” Minister Sevinger a expresa. “Manera mundo ta reaccionando, nan ta wak cu esaki ta e caminda pa cana y nan ta apoya Aruba.”

Expresionnan haci den e articulo aki no necesariamente ta refleha opinion di ArenaPoliti.co