Hopi admiracion expresa pa e trabou riba e tema di sostenibilidad na Aruba 
Prome Minister Mike Eman a inaugura e festival y tabata e keynote speaker di e anochi special na Miami 

ORANJESTAD – E admiracion cu tin pa logronan di Prome Minister Mike Eman riba tereno di energia sostenibel pa loke el a logra y ta haciendo pa su pais, ta e motibo cu el a keda scogi como orador encarga cu apertura di Film Festival na Miami-Dade riba e tema Medio Ambiente.

Prome Minister Mike Eman a hiba palabra diaranson anochi na apertura di e di shete “Miami & the Beach Environmental Film Festival” (MBEFF), cu ta tuma luga for di 15 pa 19 di april. E ta un evento organisa door di  ECOMB (Environmental Coalition of Miami & the Beaches), cu ta presenta un variacion di pelicula di e tema di ‘conscientisacion di cambio climatico’ na diferente teatro di Miami-Dade. E aña aki tin tambe un forum pa hobennan caminda ta trata e temanan di cambio di clima y lama.

E organisadonan ta menciona cu Prome Minister Mike Eman, kende su pais a asocia su mes na Carbon War Room (CWR), kier logra cu e isla ta bira 100 porciento dependiente di energia renobabel pa 2020, como e motibo cu a invita Aruba su Prome Minister como keynote speaker.

E meta tras di e festival aki, segun a wordo splica door di Gabriole van Bryce, Board Director di Environmental Coalition of Miami & the Beaches, ta pa educa tur e ciudadanonan di Miami-Dade County riba temanan di medio ambiente. “Nos tin un eco sistema unico y nos kier sigura cu e hendenan ta consciente con nan mester actua pa preserva esaki, sra. Van Bryce a splica den su introduccion riba e motibonan di e evento cu nan ta organisa.

Tambe el a papia riba kico ta haci e evento di e aña’ki algo unico, cu ta e envolvimento di Reino Hulandes. “Envolvilmento di Reino Hulandes tabata no solamente instrumental den transformacion di e comunidad local, pero tambe di esun di Miami-Dade, den lidernan mundial pa enfrenta un relacion nobo cu awa. Reino Hulandes ta un lider continuo pa nos tur aki presente.” Pero mas special pa e organisadornan tabata di por conta cu presencia di Prome Minister di Aruba Mike Eman, cu na e momentonan ey tabata na Miami como lider di un delegacion comercial di Reino Hulandes na Miami. “Su relacion cu Sir Richard Branson, cerando un compromiso pa ta totalmente dependiente di energia renobabel pa 2020 ta un compromiso grandi. Principalmente si mira cu a logra yega na un 30% di e meta aki caba, loke ta algo increibel. Esaki ta demostra na mi cu e poder di liderazgo, si bo ta riba un isla chikito of un ciudad grandi, ta depende di e disponibilidad politico y liderazgo pa ta suficientemente preocupa pa tuma e pasonan necesario.” E director a sigui señala cu Prome Minister Mike Eman ta un persona hopi unico den un grupo chikito di lidernan mundial cu realmente ta e ‘front runnernan’. “Nan lo wordo recorda den historia como e personanan cu a guia nos den e cambionan mas grandi den historia di medio ambiente y humanidad.”

Expresionnan haci den e articulo aki no necesariamente ta refleha opinion di ArenaPoliti.co