ORANJESTAD – Prome Minister Mike Eman no a biaha pa Toronto, Canada, solamente pa participa den e Toronto Global Forum pero e probecha pa pone diferente otro encuentro riba su agenda, manera reunion cu institutonan educativo. Un di e encuentronan aki tabata cu un delegacion di The Earth Institute Columbia University.

Prome Minister Eman semper den tur su encuentronan a wordo compaña pa Minister Plenipotenciario pa Aruba na Washington, D.C., Andy Lee.

Dos aña pasa un delegacion di Columbia University tabata di bishita na Aruba, unda cu a pone e prome contactonan cu Earth Institute, pa busca cooperacion. Awor Prome Minister Eman tabatin otro encuentro cu Profesor Redlener di e Instituto pa mira con por sigui coopera. A keda acorda cu ta pone un grupo sinta hunto, esta e Green Faculty, pa mira con por traha hunto. “Aruba ta ofrece un bon posibilidad riba e tereno aki, esta pa fungi como ehempel pa Caribe y tambe pa purba genera conocemento riba diferente areanan di cambionan climatologico. Caribe tambe por probecha di e conocemento aki cu The Earth Institute por ofrece na Aruba y e isla tambe na Caribe. Den cuadro di esaki Prome Minister Eman a yega na e acuerdo cu Earth Institute pa mira con ta bay sigui traha hunto,” Andy Lee a duna di conoce.

Ta bentaha so por tin pa presencia di Earth Institute na Aruba, Lee a bisa. E cambionan climatologico cu ta bay tin pa Aruba y mundo ta hopi grandi. Caribe sigur, Lee ta bisa, ta wordo basta afecta pa e cambionan ey y ta importante pa tin e conocemento riba con e impacto ta tuma luga y ki solucionnan por bini cune. Y ta hustamente riba e solucionnan e Green Faculty por hunga un rol hopi importante trahando cu e instituto pa logra yega na solucionnan cu e cambionan climatologico ta presenta. Entrante fin di e aña’ki tin un conferencia grandi na Paris unda cu lo yega na acuerdo entre hopi pais na mundo riba e accionnan cu mester tuma pa mitiga efecto di e cambionan climatologico. Den cuadro di esaki lo mester di hopi mas conocemento pa mira si ta riba e bon caminda y con ta trahando cu e palabracionnan haci. Den cuadro di esaki e Green Faculty y e cooperacion cu Aruba tin cu Earth Institute lo por hunga un rol pa Caribe cu nos por beneficia for di dje, y sigur Aruba.

REUNION CU OAS

Un otro organisacion cu Prome Minister Eman a reuni cu nan tabata Organisation of American States (OAS) , Presidi pa Luis Almagros. A papia ampliamente con Aruba lo por hunga un rol den e organisacion aki. Manera ta conoci, cu Reino, ta observador di e organisacion. Pero Aruba como isla chikito y un isla den Caribe cu ta basta bon desaroya, lo por hunga un rol bastante importante. “Nos tin un bon sistema di siguridad social, nos tin bon sistema di seguro medico, cobertura universal. Tur esakinan por ta modelo pa region,” Lee a comenta.

Durante e encuentro aki, Prome Minister Eman a probecha pa invita sr. Luis Almagros pa participa den e siguiente edicion di Green Conference, den luna di october, como un di e oradornan. Por bisa cu ya caba sr. Almagros a acepta e invitacion aki.

Otro encuentro cu e delegacion tabatin, uno cortico y otronan mas largo, tabata cu e ex-Prome Minister Israeli Shimon Peres. Israel ta un pais cu hopi conocemento riba energia solar pero tambe nan tin hopi experiencia den e area den “water security”. Den un clima similar, of mas seco cu Aruba, Israel ta produci suficiente cuminda pa consumo local. E conocemento aki ta algo cu lo beneficia Aruba, si yega na un cooperacion riba e tereno aki. Ademas a papia di e lasonan di Aruba cu Israel, y sondea con por traha hunto riba tereno di agricultura, etc., pa por yega na un miho produccion di alimento na Aruba. Sr. Shimon Peres, kende a gana Premio Nobel di Paz, lo por logra cu e cooperacion por wordo realisa, esta e ayudo den conocemento.

Expresionnan haci den e articulo aki no necesariamente ta refleha opinion di ArenaPoliti.co