Aruba reconoci un biaha mas riba plataforma internacional 

ORANJESTAD- Elogia pa su esfuersonan sin igual riba tereno di sostenibilidad, Aruba a bira e ganado absoluto di e Premio "Destination Leadership" di e ‘Wold Legacy Awards National Geographic’ e siman aki na ITB Berlin, e convention mas grandi na mundo riba tereno di turismo.

Cuatro aña pasa Prome Minister Mike Eman, a expresa un ambicion masha special: Aruba a pone como meta pa na 2020 e isla ta completamente sostenibel, un sociedad cu ta independiente di petroleo. Un sociedad di cinco strea, tabata y ta e deseo di Prome Minister Eman. Un sociedad sostenibel cu ta funciona riba energia berde, na unda crecemento economico ta sirbi e bienestar di e hendenan. Con logra esaki??

Riba 31 di Maart 2014 Eman a presenta e vision aki durante e prestigioso evento TEDxBinnenhof 2014 na Den Haag. Dilanti algun di e mentenan mas briyante di Hulanda – y miyones cu tabata sigui e programa rond mundo pa medio di internet – Premier Eman tabatin e honor di cera e programa. Na final e audiencia den Ridderzaal a duna Eman un ‘standing ovation’. Nos ta invita boso pa wak su presentacion riba Youtube y mira pakico el a haya e bravo aki http://youtu.be/a6WnG6b2JBA.

E esfuersonan riba tereno di sostenibilidad di Aruba a wordo cubri pa Bloomberg TV, Wall Street Journal Live, CNBC Power Lunch, CBS y otro canalnan di television nacional den entrevistanan extenso cu Eman. Recientemente Prome Minister Eman a wordo poni den centro di atencion pa Presidente anterior Bill Clinton durante un top di e Americanan y poco despues el a haya elogio di Vice Presidente Joe Biden durante e cumbre riba Energia na Washington DC, unda e rol prominente di liderazgo di Aruba pa loke ta sostenibilidad a wordo reconoci. Aruba ta tambe e punto di enfoke cu su anual Green Conference cu expertonan mundial riba tereno di energia berde y sostenibilidad como oradornan principal.

E ‘World Legacy Awards’ a wordo funda na 2014 pa duna reconocimento na compania, organisacion y destinacionnan lider riba tereno di biahamento y turismo cu ta transformando turismo sostenibel. Mas di 150 candidato representando 56 pais y seis continente a wordo nombra. Finalistanan den cinco categoria a wordo selecta door di un team internacional di 18 agentenan di biahe, kendenan ta expertonan y a haci inspeccionnan na e sitionan prome cu a scoge e ganadornan den cada categoria.   

Como e ‘Destination Leadership" ganado, Aruba a hala atencion di e huradonan pa su iniciativa di ta lidera  mundo den energia berde. Na 2012, Aruba a bira partner cu Carbon War Room di Sir Richard Branson cu a wordo funda pa bringa cambio di clima, tambe Aruba a bira partner cu otro entidadnan manera Universidad di Harvard. Door di e recursonan natural di e isla, solo y biento y un plan reactivo cu ta wordo sosteni door di e partnernan y cu e vision di Prome Minister Mike Eman, Aruba ta riba e caminda pa bira e prome pais na mundo cu ta completamente independiente di petroleo fosil na 2020.

Gobierno di Aruba ta promoviendo activamente uzo di energia renobabel pa medio di parkenan di molina di biento, un parke solar na aeropuerto, un planta di waste-to-energy, comunidadnan sabi y un inversion di un biyon cu a wordo grandemente enfoca riba eco turismo. Un trolley ganado di un premio prestigioso cu ta core den centro di Oranjestad ta e prome streetcar cu ta usa e sistema di tecnologia hydrogeno y ta core riba bateria cu ta wordo carga pa energia di biento y solo. Aruba a spaar 50 miyon pa aña pa medio di esfuersonan sostenibel y na 2014 seis isla Caribense a compromete nan mes pa sigui e "Aruba Model" door di afilia nan mes na Carbon War Room como parti di e reto di 10 isla pa haci e transicion di ta 100% independiente di petroleo fosil.

Expresionnan haci den e articulo aki no necesariamente ta refleha opinion di ArenaPoliti.co