ORANJESTAD- Na su yegada for di Uruguay Prome Minister Eman kende a representa Reino y Luxemburgo na instalacion di e Presidente nobo di Uruguay dr.Tabare Vasquez, a pone enfasis un bes mas riba e escogencianan di Aruba durante e crisis mundial cu a azota e isla chikito aki cu a haya su mes confronta tambe cu ciere di e refineria. Aruba a scoge pa inverti den economia y esey a capta atencion tur caminda. Vice Presidente di Merca Joe Biden tabatin palabranan di elogio pa e liderazgo di Aruba y na Uruguay lidernan di paisnan den region a felicita Prome Minister pa e vision di su gobierno.

Eman un bes mas a splica cu e concepto di conecta desaroyo cu e desaroyo di bienestar general ta algo cu Aruba a tuma iniciativa p’e. “Aruba kier haci e discusion aki mucho mas amplio den nos region y ta den cuadro di esaki nos ta bay tene un forum na unda profesornan cu ta autoridadnan riba e tereno aki por compaña nos durante e forum aki. Aruba a scoge pa dos punto durante e ultimo añanan di crisis”. Ta conoci cu na inicio nan tabata puntonan di discusion fuerte, pero ultimamente nan ta hayando mas y mas apoyo den mundo. Eman a menciona cu un di nan ta cu den tempo di recesion mester inverti pa saca bo pais padilanti. Inverti pa crea trabou, pa e economia por crece y inverti tambe loke Aruba a haci den poder di compra di esnan cu mas ta wordo afecta den tempo di crisis. Ta pesey cu gobierno a introduci reparatietoeslag, schoolkinderentoeslag, indexering y tambe reparatietoeslag pa pensionadonan. Esaki pasobra esnan cu mas a sufri di e crisis y ciere di e refineria mester a wordo yuda.

“Esaki a bira un debate den Reino y tambe un debate den mundo entre profesornan, pero awe tur dia di nobo Aruba ta hayando razon pa e vision y e iniciativa cu nos a tuma na e momento husto. Cifranan ta mustra cu desempleo a baha y cu economia a cuminsa crece. Ainda tin hopi trabou pa haci, pero Aruba a marca pauta si pa un direccion di un modelo economico cu den mundo awor ta wordo mira cu hopi respet, aprecio y reconocimento.”

E di dos punto cu Premier Eman kier accentua tambe ta cu una bes bo a yega na un cierto nivel di desaroyo economico ta hopi importante pa crea e mobilidad social pa e ciudadanonan por sigui crece. “Den e concepto ey nos a scoge pa un asina yama ‘Learning Society”. Den e añanan nos dilanti nos lo bay enfatisa hopi riba e oportunidadnan adicional cu nos ta bay ofrece nos ciudadanonan.” Cu e concepto aki tur hende ta haya miho oportunidad pa sigui crece den nan trabou y otronan cu ta bay scol ainda pa amplia nan oportunidadnan.

Liderazgo di Aruba ta hayando su merecido aprecio den mundo. Trabounan duro haci aki na e isla chikito den mar Caribe ta capta atencion y na Berlin Aruba a caba di haya premiacion di National Geographics pa e bon trabou cu ta wordo haci aki.

Expresionnan haci den e articulo aki no necesariamente ta refleha opinion di ArenaPoliti.co