ORANJESTAD – Palabranan positivo so Minister Plenipotenciario di Aruba na Washington Andy Lee tabatin pa e participacion di Prome Minister Mike Eman y Aruba den Toronto Global Forum, unda a papia riba e tema di cambionan climatologico.

E encuentro aki di tres dia tabata uno cu lidernan Panamericano, cu participacion di lidernan gubernamental, di sector priva y organisacionnan NGO. Y den e grupo aki tabatin Prome Minister Mike Eman, di Aruba, kende tabata keynote speaker diahuebs ultimo.

Mirando bek, Minister Plenipotenciario Andy Lee ta conclui cu e tabata un encuentro hopi interesante, unda cu a discuti temanan di interes pa paisnan di e continente Americano. Mirando tur loke cu a wordo treci dilanti, ta mustra riba e cooperacion cu mester bini entre e paisnan pa yega na un miho desaroyo den e region.

Tambe loke cu el a haya interesante, tabata e presentacion di Prome Minister di Aruba mr. Mike Eman. E mandatario, Lee a splica, a participa na e Global Forum a base di invitacion cu el a ricibi. El a papia di e situacion di Caribe y a resalta e problematicanan cu tin. A mustra con Aruba a atende cu e problemanan y cual ta e modelonan cu Aruba a uza. A splica con otro islanan por beneficia di e modelonan cu e isla aki ta uzando.

Mirando e presentacion di Prome Minister Eman, a duna un bon propaganda riba e conocemento cu Aruba a adkiri den su maneho hiba pa logra yega na ta totalmente independiente di fuel oil pa 2020. E discurso di Prome Minister Eman a wordo bon ricibi door di otro oradornan. Varios peticion a drenta pa combersa cu e mandatario di Aruba cu e meta pa trata di yega na un of otro cooperacion riba tereno di maneho sostenibel. “E tabata un bon netwerk pa Aruba y Aruba a score bon den e Toronto Global Forum.”

Prome Minister Mike Eman y su Gobierno ta trahando pa crea un sector di exportacion di conocemento pa region, esta conocemento cu a adkiri den e maneho sostenibel di su Gobierno pero tambe via di lasonan cu paisnan di Union Europeo pa Latino America y vice versa.

Expresionnan haci den e articulo aki no necesariamente ta refleha opinion di ArenaPoliti.co