Minister Otmar Oduber mester cuminsa baha for di e nubianan halto!

Ta parce cu durante e ultimo 5 añanan nunca e pueblo Arubano tin e suerte di haya nos Minister di Turismo Otmar Oduber ta papia e berdad. Ta increibel con cada biaha e minister aki mester recuri na pasado y ta cuestiona e maneho hiba riba tereno di turismo door di Gabinete Oduber. Siman pasa den un comunicado di prensa e minister aki a trece un cantidad di argumento fofo padilanti p’asina “comproba” cu ta bao di su maneho nos pais awe ta ricibi un gran cantidad di turista di calidad. Sinembargo na e altura aki ya tur hende cu sano huicio y cu ta mira e realidad mester ta consciente caba cu durante e ultimo añanan di Gabinete Eman nos pais ta ricibiendo turistanan cu no ta di e mesun calidad cu esnan cu a yega Aruba durante Gabinete Oduber. Pa comproba e ponencia aki, e siguiente indicadornan ta importante pa compara e maneho turistico hiba na 2009 y 2013:

1. E porcentahe di turistanan cu ta gana menos cu 50 mil dollar pa aña a aumenta na 2013 y esaki compara cu 2009, esta di 26.5% pa 28%. Pa loke ta e porcentahe di turistanan cu ta gana mas cu 50 mil dollar pa aña, esaki a keda igual na 2013 compara cu 2009 (55%). Pues en general nos a bay atras pa loke ta e turistanan cu entrada halto cu ta bishita Aruba.
   
   
2. E turistanan cu a bin cu pakete pre-pago a aumenta substancialmente for di 39.7% na 2009 te cu 54.8% na 2013 y esnan cu pakete all inclusive a mas cu redobla for di 20.7% na 2009 te 43.7% na 2013. Turistanan cu areglo propio a baha for di 60.3% na 2009 te 45.2% na 2013.
   
   
3. E averahe cu turistanan ta gasta pa dia a baha for di 102.74 dollar na 2009 te cu 90.32 dollar na 2013. Pues cada turista cu ta bin Aruba ta gasta 12.42 dollar menos pa dia!

Cu e 3 indicadornan aki ta keda comproba cu e calidad di turismo a cay substancialmente entre 2009 pa 2013, pero e unico persona na Aruba cu no ta mira esaki ta Minister Otmar Oduber. Alavez no mester lubida cu durante Gabinete Oduber un suma di 25 miyon florin so tabata wordo hinca pa promocion di nos turismo y cu awe na 2015 Gabinete Eman y ATA tin 80 miyon florin na nan disposcion pa promocion di turismo, pero e rendimento ta masha pober mes pa loke ta e calidad di turistanan cu ta yega Aruba.

Cifranan di e indicadornan menciona pa 2014 no ta conoci ainda, pero mirando con durante gran parti di 2014 nos pais a sigui haya turistanan cu no ta kedando den hotelnan mas, pero ta bin Aruba pa keda den apartamento y casnan di familia y tambe pa raspa tarheta di credito, lo no ta ningun sorpresa cu mas turista di menos calidad lo a bin Aruba durante 2014.

Pues lo ta bon pa Otmar Oduber cuminsa baha for di e nubianan halto cu e ta bibando aden y realisa cu e maneho cu e mester hiba riba tereno di turismo mester ta mas consistente y dinamico y di menos show y fantasia, ya cu no ta ningun arte pa traha solamente riba aumento di cantidad di turistanan, pero e calidad tambe mester aumenta pa Aruba sigui engrandece riba e tereno aki y bolbe bira un pais lider den Caribe, mescos cu durante gobierno di MEP na aña 2008 .

Expresionnan haci den e articulo aki no necesariamente ta refleha opinion di ArenaPoliti.co