Segun presidente di CFT: Voor wat hoort wat

Ta parse cu No ta argumentonan racional y resultadonan concreto di maneho ta loke ta conta den e maneho di gobierno hulandes actual pa cu Aruba. For di 2010 nan a fiha nan maneho cu tur pais di Reino den Caribe mester cay bou di CFT. Te awor no a logra haya Aruba bou di CFT. Pesey awor tin e presion grandi pa logra esey. Ta hasta usa parti di prensa local y partidonan politico pa logra esey. Den su campaña pa gana simpatia y purba drecha su imagen, CFT ta hasta usa "sticker" comosifuera ta un partido politico e ta cu ta core campaña pa eleccion di reina of eleccion politico. Den tur e intentonan di CFT y gruponan politico y psuedo-politico pa impone CFT riba Aruba, e argumentonan na fabor di e maneho di austerisacion di CFT ta keda fofo. Mas ainda, e contradiccionnan den e maneho di gobierno actual di Hulanda pa Aruba ta keda aumenta.

DICON NO?
Si e gobierno actual di Hulanda ta haya cu e situacion financiero di Aruba ta causa un peliger pa Reino, e lo por a evita e "peliger" cu e ta wak facilmente, door di laga Aruba "refinancia" henter su debe nacional na un interes hopi mas abou. Esaki lo elimina tur peliger cu Hulanda ta wak y e lo yuda Aruba spaar mas cu 200 miyon florin pa aña cu e ta paga na interes, e lo yuda Aruba keda cu placa pa baha e debe mas lihe y placa pa inversionnan necesario. Te awe no por haya un splicacion pakico gobierno Hulandes no kier haci esaki. Den combersacion cu e presidente di CFT ela duna e splicacion. Ela bisa literalmente: "Voor wat, hoort wat." Loke Hulanda kier a cambio di fiansa na interes abou, ta cu Aruba ta acepta e maneho di CFT. Pero den e mes un siman ey, gobierno actual di Hulanda ta fia Grecia, pais miembro di "eurozone" €4.7 biyon euro pa sigui cubri gastonan di operasion di e pais. Aruba tin mester di hopi menos cu e suma cu a fia Grecia pa Aruba reduci e debe substancialmente y elimina e deficit practicamente completamente. Anto no ta cu Hulanda lo paga esaki. Ta Aruba mes lo paga tur cos manera semper ela haci. Den palabra di miembronan di Parlamento Hulandes mes: "Het kost Nederland niets. Aruba betaalt het zelf."  E prijs real cu gobierno actual di Hulanda kier pa nos paga ta acepta e CFT .

Expresionnan haci den e articulo aki no necesariamente ta refleha opinion di ArenaPoliti.co