"E discucion no ta si mester bin un instancia pa conseha y haci control riba finansa publico den un forma independiente y sin agenda politico. Un stancia asina mester bin, mescos cu den paisnan grandi y chikito cu ta progresa tin pa hopi aña caba. Gobierno di AVP ta trahando riba esaki. E discucion ta si nos kier hiba un maneho finaciero, economico, social y di infrastructura balansa y sostenibel a largo plazo. Of cu nos kier un maneho limita y misquino cu lo stagna nos economia. Cu e maneho cu CFT ta hiba den nomber di e gobierno actual di Hulanda, nos ta sigur cu nos economia lo stagna, cu desempleo lo subi y cu nos lo keda pega pa hopi aña mas. Djis wak loke a sosode cu economia di Hulanda y di Corsow. Compara esaki cu loke a sosode cu economia di Aruba den e mes un periodo ey, pero sin CFT. Wak pa comparacion kico a sosode den paisnan cu a sigui e mes un maneho financiero isola di economia, di mercado laboral y di desaroyo social, manera CFT ta propaganda. Wak por ehempel Merca." Asina Rene Herde a splica.

STIMULA vs AUSTERISA
Recientemente e famoso economista Nouriel Roubini a duna un bista extenso riba desaroyo economico mundial y ela evalua e maneho di diferente pais of continentenan. Ela conclui cu e futuro desaroyo economico di Merca ta hopi bon. Roubini a mustra cu si no tabata pa e crecemento fuerte di economia di Merca, pronto mundo henter lo ta den otro crisis atrobe. Den su analisis di e "eurozone" Roubini ta bisa cu e continente europeo ta den problema y apenas un paso di un recesion. Rene Herde': "Esaki lo ta desastroso Europa y pa mundo. Pasobra nos ta depende di otro. Literalmente Roubini a bisa: Contrario cu Merca, na Euro stimulacion economico tabata mucho tiki y mucho laat. Corta gasto di gobierno y aumenta entrada ta necesario pa reduci e deficitnan riba presupuesto, pero a plazo mediano. Riba plazo cortico, austerisacion tin un efecto negativo riba crecemento economico." Lamentabelmente ta esey tabata y ta e maneho di Europa y Hulanda en particular. Rene Herde'': "Esaki ta e maneho cu Hulanda kier impone riba nos via CFT. Esaki ta otro preuba cu otro experto financiero reconoci ta duna, pa mustra cu e proposicionnan di MEP/PDR/CFT pa corta gasto y aumenta entrada pa gobierno den forma bruto lo tabata y ta desastroso pa Aruba. E maneho cu gobierno di AVP a scohe pe ta uno di stimula economia y forsa di compra di famianan prome, pa saca nos economia for di crisis y crea trabou y entrada. Despues reduci gasto y aumente entrada den forma gradual pa no stroba economia y creasion di trabou nobo. Mescos cu Merca e strategia aki a y ta sigui duna bon resultado. Nos no ta cla. Aibda falta. Pero esaki ta e maneho corecto! Resultadonan ta papia pa nan mes."

Expresionnan haci den e articulo aki no necesariamente ta refleha opinion di ArenaPoliti.co