Prome Minister Eman diabierna den oranan di merdia a ricibi bishita di un grupo di comerciante di Taiwan lidera pa comerciante George Chen, kende ta presidente di G&T Trading International Corporation, estableci na Merca. E ta un miembro di Camara di Comercio di Taiwan.

E delegacion a yega Aruba diahuebs y lo keda riba e isla te cu Dialuna. Nan tin algun contacto aki y a dicidi pa bini y sigui explora e posibilidadnan pa un relacion comercial.

Sr. Cheng tin un relacion comercial di basta aña caba cu Meta Group y den e cuadro aki, a reuni diabierna mainta cu nan pa mira con sigui estrecha e lasonan. Cheng ta cumpra material di reciclahe di e grupo aki.

Awor den e delegacion cu ta di bishita na Aruba pa explora posibilidadnan di cooperacion, tin representantenan di mundo di construccion, bancario, di seguro, reciclahe, pesca, etc. Aunke nan ta estableci na New Jersey, tur ta procedente di Taiwan. Nan ta en busca di mas posibilidad di negoshi y a scoge Aruba como un isla sigur y unda nan ta sinti nan mes comfortabel, cu hendenan hopi activo. "Esey ta meta di nos bishita na Aruba, Cheng a comenta.

Nan a keda di reuni cu Camara di Comercio di Aruba pa mira cual ta e posibilidadnan pa estrecha e lasonan cu e grupo di comerciantenan di origen Taiwanes. "Kisas tin hende cu kier haci negoshi cu nos na Merca. Nos deseo ta pa tin lasonan comercial a largo plaso."

Sr. Cheng di cu e ta masha agradecido cu Prome Minister Mike Eman a habri e porta pa comerciantenan Taiwanes y a papia riba e proceduranan pa habri un negoshi na Aruba. Como cu sr. Cheng conoce Aruba caba, el a percura pa un delegacion bini Aruba pa sondea loke ta mas realisabel cu gruponan di Aruba. Un di e ramonan cu e ta mira interesante ta casamento y honeymoon.

Den e encuentro cu Prome Minister Eman a discuti e tema di sostenibilidad di cual algun miembro di e delegacion ta concentra cu nan negoshi riba e tereno aki tambe. Den su caso, por ehempel, e ta contribui pa trata di haci e isla mas limpi door di exporta for di Aruba pa Taiwan varios material cu ta reciclabel. "Di e manera aki Aruba ta bira mas bunita pa turismo," el a duna di conoce.

Expresionnan haci den e articulo aki no necesariamente ta refleha opinion di ArenaPoliti.co