ORANJESTAD/PANAMA CITY- Durante di su bishita di trabou na Panama, Prome Minister Mike Eman a probecha pa haci un presentacion na representantenan di companianan estableci of cu tin filiaalnan na e pais aki cu interes pa expande nan red di franchise. Eman a presenta e diferente opcionnan cu Aruba ta ofrece, pero a concentra mas riba tur cos riba e enfoke pa atrae mas negoshi di marcanan renombra pa Caya Grandi.

Embahada di Reino Hulandes na Panama den persona di Wiebe de Boer a logra trece hunto un grupo grandi di empresario pa e presentacion. Entre nan tabatin Karlennys Gutierrez, kende ta director di EcoWave, e prome franchise di limpiesa y mantencion den Latino America. El ta haya e proyectonan di expansion di e parti di centro di cuidad ta interesante.

Como cu Gutierrez mes no conoce Aruba ainda, pero su compania ta activo na Venezuela cu 200 empleado y den apenas un luna ya tin 10 empleado na Panama e tin tur intencion pa expande den ful Caribe y Latino America. Su interes pa bishita Aruba ta grandi y e ta pensando den direccion di habri un franchise aki cu un aliado local.

Flavios Papasakellariou, presidente y fundador di Papasakellariou Group a mustra interes pa establece un franchise na Aruba tambe despues di e presentacion di Eman. El a splica cu e siguiente paso ta pa keda den contacto cu ARINA (Aruba Investment Agency) pa organisa un bishita pa Aruba, posiblemente na luna di oktober, despues di e expo grandi pa companianan di franchise cu ta tuma luga na september na Panama.

E grupo STT tambe tin intencion serio pa establece su actividadnan na Aruba. Su representante Katiuska Rivas a splica cu loke mas a atrae nan atencion ta cu no ta necesario mas pa un inversionista di exterior tin un partner local pa por establece un negoshi na Aruba. El a bisa cu STT Group ta activo caba den Panama y Costa Rica y ta cla pa expande den Caribe, entre otro.

Rivas, kende ta originalmente di Venezuela, tabata na Aruba pa vakantie na 2005 y a remarca cu den presentacion di Premier Eman el a wak cu tabatin hopi crecemento den turismo y cu e isla ta mustra hopi interesante pa haci inversion.

STT Group posiblemente lo ta bishitando Aruba na luna di juli pa tuma decisionnan y explora e posibilidad pa inicia actividadnan na Aruba e aña aki ainda. Rivas a splica cu un oficina na Aruba lo beneficia di cuentanan regional, unda cu STT lo por maneha personal pa otro companianan na Aruba. El a agrega cu entre otro nan ta conta cu Novartis como cliente.

Ana Maria Cerda Arria di Prestige Financial Service tambe a atende e presentacion cu hopi interes. Diferente factor a capta su atencion y e lo ta bishitando Aruba den futuro cercano pa bay mas den detaye tocante esakinan. Cerda Arria a bisa cu algun factor ta necesario pa discuti ta e incentivonan pa inversionistanan stranhero, incluyendo e incentivonan fiscal, economico y migratorio.

El a añadi cu su compania entre otro ta representa marcanan di articulonan pa restaurant y cu ta haci transporte di desperdicio di barconan crucero, cu lo por ta interesante pa trece Aruba. Cerda Arria a expresa cu e ta kere cu su compania por ocupa un espacio importante den e proceso di crecemento di turismo, cu ta un industria cu nan ta kere aden cu pa Aruba lo sigui fuerte y importante.

El a conclui bisando cu Prestige Financial Service lo por genera bastante empleo directo y indirecto na Aruba.

Expresionnan haci den e articulo aki no necesariamente ta refleha opinion di ArenaPoliti.co