ORANJESTAD/PANAMA CITY- Durante su bishita na Panama liderando e delegacion di Reino Hulandes na e conferencia pa industria maritimo y logistica Prome Minister Mike Eman a reuni cu diferente inversionista y representantenan di marcanan di renombre cu tin derechonan pa distribucion regional.

El a bisa cu e enfoke ta riba Caya Betico Croes y no tabata e intencion pa ta anfitrion di inversionistanan cu un interes general pa henter nos isla, pero e delegacion di Aruba a keda contento cu e interes asina grandi di parti di tur cu a atende e reunion. Eman a bisa cu el a presenta tambe e tres zonanan fiscal cu ta den desaroyo pa proximamente wordo presenta na Parlamento.

Ademas el a splica tocante Freezone y waf di container nobo pa stimula actividadnan di movecion di carga via di Freezone pa e region.

Eman a papia tambe tocante por ehempel e posibilidad pa haci uzo di “investeringsaftrek”, un incentivo fiscal cu a wordo reintroduci caba, unda cu empresarionan ta haya un porcentahe considerabel reduci for di impuesto pa cu nan inversion inicial den meubles, decoracion y nan prome inventario, entre otro.

E mandatario a subraya cu e incentivonan fiscal cu a wordo presenta naturalmente tambe ta valido pa comerciantenan local.

Minister President Eman a califica e encuentro como exitoso. E presentacion tabata dirigi particularmente na realisa e desaroyo y inversionnan den Caya Grandi y Centro di cuidad. E meta tabata pa encurasha companianan di Panama cu tin licencia pa distribui marcanan renombra y habri tiendanan di e marcanan aki – conoci como anchor stores y considera Aruba – specificamente - Caya Grandi pa nan actividadnan na Aruba.

Eman a menciona como ehempel e tienda Mango cu ta un atraccion pa clientenan bishita Caya Betico Croes. E ta di opinion cu falta mas di e tipo di tiendanan manera Mango pa atrae mas hende pa bishita e area comercial aki.

Na Panama ya caba tin empresarionan di diferente marca cu tin un relacion cu Aruba, pero e tiendanan aki ta den mallnan y awo kier trece otronan pa Caya Betico Croes, sea pa medio di inversion directo for di Panama of den colaboracion cu un representante, empresario of compania di Aruba mes.

“Nos a haci esfuerso tambe pa empresarionan di Aruba por a bini cu nos, pero nos no tabatin tur e informacion ainda riba tur e marcanan cu tin disponibel akinan,” Eman a expresa. El a agrega cu “awo cu nos a haya e informacion ey tambe nos lo organisa un evento na Aruba caminda nos lo notifica e empresarionan di Aruba cu e interes tey, vooral esnan cu ta buscando di mira con den centro di nos cuidad nan por cuminsa cu un empresa.” Mike Eman a conclui bisando cu un evento lo sirbi pa “mustra riba e contactonan cu nos a haya na Panama y mira si nos por acopla e empresarionan di Aruba cu esnan cu nos a topa akinan pa asina nos propio hendenan tambe haya oportunidad pa por drenta den contacto cu esnan cu tin e licencianan aki cu ainda no tin un contacto na Aruba.”

Expresionnan haci den e articulo aki no necesariamente ta refleha opinion di ArenaPoliti.co