ORANJESTAD - Diaranson den oranan di merdia Minister di Finanzas, Angel Bermudez a wordo notifica cu Cuerpo di Aduana a tene un ‘walk out’ na Aeropuerto Reina Beatrix pa expresa nan malcontento cu e ultimo cambionan cu Director Croes a propone recientemente. Despues cu esaki a ripiti diahuebs atrobe, den oranan di atardi e mandatario a sinta na mesa cu Sindicato di Aduana (SADA) y director Sr. Croes.

E puntonan di discusion tabata e cambio proponi di e ‘continu dienst’ na aeropuerto y e reglamento di examen den cuadro di e curso di ‘Hoofdkommies’.

Minister Bermudez a splica cu actualmente tin hopi presion di trabou riba e duaneronan pa motibo di varios curso cu ta andando (e curso di ‘Hoofdkommies’ y ‘verificateursopleiding’), ademas di e suspension reciente di 7 empleado. 

“Fin di aña definitivamente ta un ‘high season’ pa Departamento di Aduana, unda cu un cantidad grandi di container ta drenta. Mientras tanto tin un control 100% andando den waf, pa motibo di e caida den invoerrechten e aña aki”.

E mandatario a sigui splica cu den e cuadro di un ‘manpowerplanning’ efectivo, director Croes a propone e cambionan y lo sigui haci su maximo esfuerso pa e departamento funciona efectivamente. “E ta keda na e Director pa aloca su tripulacion lo mas eficiente posibel."

SADA di su banda a splica cu nan ta compronde esaki, pero cu e ekipo di aeropuerto tambe ta den su high season; tanto pa vuelonan regular, como avionetanan, y cu nan ta considera e proposicion di elimina e ‘night shift’ di 12:00 di marduga pa 8:00 am. mucho riesgoso.

Na final di e reunion aki a palabra cu e warda di anochi lo consisti di 2 duanero y cu lo bay pone na nan disponibilidad di un ‘dienstauto’ di ‘surveillance’ pa core den tereno di aeropuerto y tambe banda pa pazuid ora tin avioneta den oranan di madruga.

Di e tripulacion na San Nicolas, temporalmente 5 duanero lo asisti den ‘vrijmaking’ den waf, lagando 2 colega pa atende e servicio eynan. Mientras tanto ta averigua si tin coleganan cu ta tuma vakantie den December, si nan ta dispuesto pa hala esaki pa otro aña.

Pa loke ta trata e reglanan di tentamen, e mandatario a propone pa busca un opinion huridico riba e topico aki pa fin di siman.

Finalmente, tanto SADA, director Croes di Aduana y Minister Bermudez a conclui cu no tin disputa mas riba e topiconan menciona y cu tur partido ta satisfecho cu e palabracionnan.

E mandatario a manifesta cu semper por dialoga pa propone alternativanan, basta cu e resultado ta pa miho y no cu mas gasto, pasobra e lema di gobierno ta keda: "Nos mester haci mas cu menos!"

Expresionnan haci den e articulo aki no necesariamente ta refleha opinion di ArenaPoliti.co