Diabierna comision di asuntonan social di Parlamento a reuni cu 11 instancia pa asina haya mas informacion di e campaña actual cu ta hiba e nomber di “Abuso di mucha, Stop awo!”

Meta  

E campaña tin como meta pa concientisa pueblo riba e tema di abuso y asina preveni cu muchanan ta bira victima di esaki. Ora ta papia di abuso no ta referi solamente na abuso fisico sino tambe abuso emocional, sea cu e mucha ta wordo abusa verbalmente of e mucha ta testigo di violencia domestico. Importante ta pa traha riba e parti di concientisacion pa asina comunidad reconoce cu tin abuso ta tuma luga y pa nan ta na altura di unda por acudi pa ricibi ayudo.

E presentacion

Segun e presentacion cu e comision a ricibi di Bureau Sostenemi, 1 di cada 15 mucha na Aruba ta victima di abuso fisico-emocional. Esaki ta segun un investigacion hasi na 2008. Bureau Sostenemi mes ta atende un promedio di 250 caso pa aña. E aña aki te cu Oktober tabatin 313 caso di abuso di mucha cu a ser registra, loke ta nifica cu e problematica aki ta creciendo. E abuso cu e mucha ta experencia por tin como consecuencianan cu e mucha ta bira un dropout, ta bai forma parti di un gang, ta participa na vandalismo y criminalidad y ta duna indicacionnan di problema di comportacion y problema pa siña.

Durante e presentacion a splica cu a presenta un poster na kleuterschoolnan rond di Aruba caminda cu e derechonan di mucha ta wordo trata den klas pa asina concientisa e muchanan na un edad trempan y duna nan guia pa nan siña conoce nan derechonan miho. Parlamentario Kelly a compronde cu mayoria di e meldingen di casonan di abuso ta wordo hasi pa scolnan. E scol ta ripara cu tin indicacion cu un alumno ta confrontando problemanan social-emocional y ta meld e caso na Bureau Sostenemi of na un di e otro instancianan.

Retonan

A papia di varios reto cu e instancianan ta haya nan confronta cu ne. Un di nan cu a bin dilanti ta e falta di personal. E trabou aki no ta uno facil y constantemente e instancianan ta sinti cu tin falta di hendenan pa yudanan hasi e trabou na un manera mas eficiente. Un otro reto cu tin cu atende cu ne ta e instrumentonan legal. Tin caso caminda cu violencia domestico ta tuma luga y cu e mayor, por ehempel e mama tin poco caminda pa cana pa loke ta trata opvang. Pa sali “safe” di e situacion aki e ayudo ta hopi limita den sentido di ayudo legal. Bo mester ta bon documenta y e ta un caminda largo, ya cu tin biaha e straatverbod por ehempel no ta wordo respeta. Esaki ta preguntanan cu mester manda pa Minister pa haya sa kico Minister su maneho ta den e casonan aki, segun Parlamentario Kelly a trece dilanti.

Expresionnan haci den e articulo aki no necesariamente ta refleha opinion di ArenaPoliti.co