Chris Romero (MEP): Laga e dia di mucha aki ta uno di refleccion pa nos futuro generacion
E celebracion di dia di mucha ta data for di aña 1924 ora cu Nacionnan Uni a establese cu “humanidad debe su muchanan e mihor cu e tin a ofrece”. Despues di un guera mundial unda cu hopi mucha a perde nan bida, lidernan mundial importante a acorda pa tuma medidanan pa asina salvaguardia e bienestar di e muchanan rond mundo.
Un mucha ta un ser humano den un proceso constante di crecemento, formacion y aprendisahe. Ta p’e motibonan aki cu e ta sumamente importante y necesario pa un mucha lanta den un ambiente adecua, cu dosis halto di felicidad, amor y comprension, den un seno familiar cu lo brinde e proteccion y asistencia necesario den su crecemento. Di e manera aki e mucha aki lo por prepara debidamente pa asumi su rol como adulto responsabel den comunidad, ora cu e momento yega.
Lastimamente nos no por sera wowo na e realidad cruel cu nos mundo ta pasando aden actualmente, unda cu un bes mas muchanan inocente ta birando victima di gueranan cruel y innecesario hopi biaha. Pero apart di e muchanan cu ta birando victima di guera, tin otro gran cantidad cu ta biba den miseria, wantando sea friu of calor extremo y sin nada pa come. Muchanan cu ta bibando un bida inhumano danki na e intolerancia y indiferencia di esnan cu tin e poder di duna nan e ayudo cu nan mester.
Pesey, awe ta un bon dia pa nos tur, mucha y adulto, reflecciona riba e importancia di duna contenido na e derechonan di un mucha. Si nos kier un mihor futuro pa nos mundo, nos tin cu cuminsa na duna y siña nos muchanan lo mihor cu nos tin pa ofrece. Un mucha lo bira e adulto cu nos siñ’e pa ta. Ban percura pa siña nos yiunan pa t’e mihor version di loke nos como adulto ta aworaki.
Expresionnan haci den e articulo aki no necesariamente ta refleha opinion di ArenaPoliti.co