Ministerio di Transporte: Aruba ta sigui crece riba nivel di registracion di avionnan
Dos avion luhoso mas lo keda registra na nos isla
Siman pasa Minister Otmar Oduber tabata na Las Vegas unda el a sostene diferente reunionnan y tabata presente pa e celebracion di e 20 aña di Registry of Aruba cu a wordo celebra durante e Convencion di Exhibicion di e National Business Aviation Association.
Minister Oduber tabatin palabranan di elogio pa esnan di Registry of Aruba mirando e desaroyo di registracion di avionnan, e atencion y promocion cu nos isla ta hayando den e convencionnan y exhibicionnan aereo cu ta tuma lugar na diferente pais.
E mandatario a haya oportunidad di intercambia di opinion cu diferente di e companianan presente y mester menciona cu dos oportunidad grandi a resulta pa Aruba.
E prome ta cu e compania Comlux, cu ya caba tin avion registra na nos isla, awor nan lo registra un otro mas, un Airbus 330 totalmente luhoso cu lo carga e P4 di Aruba den aire.
Tambe Minister Otmar Oduber a reuni cu Richard Ziskind, Vice President & Managing Director di Crystal Luxury Air. Crystal Cruises, e linea cruero luhoso mas premia na mundo, a tuma e decision di expande su mes den e industria di biahenan luhoso, ofreciendo asina un variacion di itinerarionan mundial.
E compania aki ta bay traha cu e Registry of Aruba den desaroya y obtene un Air Opeator’s Certificate (AOC), permitiendo e compania luhoso aki bula internacionalmente.
Minister Oduber ta sumamente satisfecho cu e resultado di e diferente reunionnan y cu e dos logronan aki cu ta demostra un biaha mas cu seguridad aereo di nos isla ta sigui wordo reconoci mundialmente y ta sigui habri camindanan pa avionnan luhoso. El a gradici ada un di e personanan cu tur dia ta labora den e ramo aki y ta mantene y sigura e seguridad aereo na nos isla.
Expresionnan haci den e articulo aki no necesariamente ta refleha opinion di ArenaPoliti.co